Khliehriat jylliew 17: Ha kajuh ka por u Deputy Commissioner ka East Jaiñtia Hills District, ha ka jingpynbna paidbah ba la pyllait mynta ka sngi, u buh ka jingkyntu ïa baroh ki nongleit jingleit ba kin wad noh da kiwei ki lad, ki lynti namar ka surok national highway (NH-6), ha East Jaiñtia Hills District ha Narpuh, ka la shah khang lynti na ka daw ka jingtwa ka khyndew bad jinghap ki maw ha surok hajan ka tunel ha Sonapyrdi, kaba la khang lynti ïa baroh ki kali kiba ïaid lyngba na kane ka surok.
La ong ruh ba ka jingpynkhuid ïa ka surok ka dang iaid shakhmat bad kan shim por palat ïa ka 24 kynta namar ka jingjur palat ka jingtwa ka khyndew ha katei ka jaka.
