Jowai, Ïaïong 29: Ki Muktiar hapoh ka West Jaiñtia Hills District mynta ka sngi thohdieng kila ïoh jinghikai halor ki rukom treikam kiba long katkum ka juk stad ba mynta da kaba pyndonkam ia ki tiar Technology ban kham pynsuk shuh shuh ïa ka jingtreikam ha kaba ïadei bad ki kes bapher bapher.
Ïa kane ka prokram ai jinghikai halor ka rukom treikam jong ka ‘Case Information System’ (CIS) la pynlong da ka Computer Committee, High Court of Meghalaya, ha ryngkat ka jingïatreilang bad ka Meghalaya State Legal Service Authority ba la pynïaid da ka Jaiñtia Hills Autonomous District Council Court, ha Tpep- Pale Hall Jowai.
Ha kane ka sngi la wan ban sakhi da u Judge ba donburom ka Meghalaya High Court u Hamarsan Singh Thangkhiew uba long kum u kongsan, uba la pynpaw ka jingsngewkmen ban ïa don bynta lang ha kane ka sngi.
U Judge Thangkhiew ula pynsngew ba ka jingdon jong ka District Council Court ha Jowai ka la long kum ka lad jingïarap kaba khraw eh ïa ki nonghsong shnong kiba dei na ki trai jylla ban iakhun ia ki kes jong ki da kaba ym donkam shuh ban leit shaduh High Court.
Ula pynkymmaw ha kine ki snem jong ka khlam Covid-19 ki don shibun ki jingeh hynrei ha ka rukom treikam lyngba ka jingpyndonkam ïa ki bor jong ka juk stad la lah ban pynïaid beit pynïaid ryntih ïa ki kam ki jam.
Ka jingpyndonkam ïa ki mobile (Smart Phone) mynta ka la dang ïarap shuh shuh ha ka rukom treikam ban wad ïa ki record jong ki kes bapher bapher, ha ka juh ka por u kyrmen lyngba ka jingpynlong ïa kane ka CIS katkum ka juk Internet kan ïarap ban pynbha ïa ka rukom treikam hapoh ka jylla hi baroh kawei.
Ïa ka jingïalang la pynïaid da ka kong V. Kyndiah Additional Judge, Aditional District Council Court Jowai, la ïoh ruh ïa ka jingbatia bniah ïa ki Muktiar da ki riew shempang halor ki phang bapher bapher jong ka rukom treikam ka ‘Case Information system’ kaba lah tuj ban ai jingrap ha kiba bun ki liang.
