Shillong, Jylliew, 15: Ki Pulit Mawlai Police Station ha ka sngi Palei ki la kem ïa u Bah Trophius Nongbri halor ka jingkynnoh ba la suba ba u dei uba donkti ban dkhat jubor ïa ka jingim jong ka kurim lajong ka Kong Steffanie Lyngdoh Nonglait, 30 snem eiei ka rta.
Kane ka la jia ha iingsah ha ka shnong Mawlai Nongmali, Shillong ha ka miet sngi Balang.
Katkum ka ejahar ba la mudui sha ki Pulit ka Mawlai Police Station, ka Kong Amanda Lyngdoh Nonglait, kaba dei ka para jong ka Kong Steffanie ka la ïathuh ba ka la ïoh ïa ka khubor halor ka jingkhlad jong ka hynmen hapdeng ka por 8.45 duna bad 9:00 baje eiei mynmiet ha ka sngi Balang ïa kaba la pyntip hi da u kurim jong ka Kong Steffanie halor kane ka jingjia.
Ka kong Amanda ka la pynpaw shuh shuh ha ka ejahar ba kum ka ïing ka sem kam lah satia ban pdiang ïa ka jingkhlad kyndit jong ka Kong Steffanie namarba ka dei ka briew kaba don hapdeng ka met kaba koit ba khiah.
Ki bahaïing hasem tang shu ïoh jingtip halor kane ka jingjia ki la leit marmar sha ing sah jong ka Kong Steffanie ha kaba ki la kam ba ki la lap ïa ki dak ki shin ha ka bynta jong u ryndang bad kum ka ïing ka sem ki la suba jur ba ïa kane ka kam bymman la leh hi da u kurim u Bah Trophius Nongbri.
Ka Kong Amanda ka la pyntip ha ka ejahar ba ka Kong Steffanie ka dei kaba dang pun ruh ïa i khunlung iba dang hapdeng ka rta kaba 2 ne lai bnai.
Ha ka jingïakren bad ki lad pathai khubor ha phyllaw ka NEIGRIHMS Hospital, ka Kong Amanda ka la kam ba ka la ïoh jingtip halor ka jingïashrut jong kine ki shijur na ki SMS kiba ka Kong Steffanie ka ju phah sha ka manla ka por.
Uwei na ki bakha jong ka Kong Steffanie u la ïathuh ba ha ka por ba ki la leit peit ïa ka met jong ka Kong Steffania ha iing kim shym la ïohi dak eiei ba kane ka longkmie kan sdien phasi ïalade namarba wat ka Sad jong ka iing ka dei kaba la tap da u shylliah.
Ha kaba ïadei bad kane ka jingjia, ki Pulit ki la kem noh ïa u Bah Trophius Nongbri bad pynngat ha Section 302IPC bad ka jingtohkit halor kane ka jingjia ka dang ïaid shakhmat.
Na ka liang jong ki bahaïing hasem ki la leit ban shimti ïa ka met na NEIGRIHMS Hospital hadien ba la pyndep ïa ka jingle post mortem shwa ban pyndep ïa ka jinglehniam bakhatduh.
