Shillong, Jylliew 15: Ka Sorkar Meghalaya ka la maham tyngeh ïa ki shakri sorkar ba kim bit satia ban ïashim bynta ne leit ha ki jingïalang ne ki jingïakhih ba la pynlong da ki Seng Saiñpyrthei.
Ka Commissioner & Secretary to the Government of Meghalaya Peronel & AR, ka Kong R. Lyngdoh, ha ka hukum ba la pynmih ha ka 13 tarik mynta u bnai, ka la ong ba ka sorkar ka la lap ba dang shen ki shakri sorkar ki la ïashim bynta pylleiñ pylleiñ ha ka jingïalang jong ki Seng Saiñpyrthei bad kane ka jingleit sha ki jingïalang kiba don ryngkat bad ka jingïakhih pyrshah sorkar ka pynkheiñ ïa ka Rule 20 (1) jong ka Meghalaya Services Rule (Conduct) Rules, 2019, kaba khang pyrshah ïa ki nongtre sorkar ban long ki dkhot ne ban pynïasoh bad ki Seng Saiñhima.
“La bthah ïa baroh ki shakri sorkar ba kin bud pyrkhing ïa kane ka kyndon da kaba kiar ban leit ne ïadon bynta ha kino kino ki kam kiba long pyrshah ïa ka sorkar”, la ong ka Kong R. Lyngdoh.
Shuh ka la ong ba lada lap ïa ki shakri sorkar kiba pynkheiñ ïa kane ka kyndon kin ngat ha ka jingpynshitom ki kyndon kiba tyngeh kiba long katkum kane ka Rule jong u snem 2019.
Kane ka hukum ka maham ruh ba kin leh kino kino ki kam kiba long kum ki jingïarap bad ki jingkyrshan ïa kine ki jingïakhih kiba long pyrshah ïa ka sorkar.
La bthah ruh ïa baroh ki khlieh jong ki tnad treikam jong ka sorkar bad ban pynpoi shaduh ki District bad kiwei de ki ophis kiba don ha ki kyrdan ba kham shapoh.
