Shillong, Jylliew 15: Uwei u samla uba la tip kyrteng kum u Paul Lyngdoh Mawphlang ha ka sngi Palei u la pynlait im ïa iwei i khun dkhoh iba thiah ha madan na ka daw ba im lah her shuh bad une u samala hadien ba u la ïohi ïa kane u la leit ban shim ïa ine i khun sim ban leit aiti pat sha ka tnat Wildlife.
Haba ïakren bad une u samla u la ïathuh ba ïa ine i khun dkhoh i dei iba u la ïoh tam na lynti ïaid kaba don ha jan ka ophis ka Directorate of Information and Public Relation (DIPR), Lachumiere hynrei u ong ba na ka daw ba ine i khun sim im lah her ka pynlong ïa u ban leit aiti noh sha ka ophis ka tnat Wildlife ha Lachumiere.
“Ki sim ki don ki don ka bynta ban im lang ha ka mariang bad mynta lei namar ngi ïohi ba ka jingdon ki sim ki doh ka la duna shaba palat pud ngim dei ban shu pynïap pathar hynrei ban ailad ba kin im lang ha ka mariang,” ong u Bah Paul.
Haba ïoh ban ïakren bad uwei u ophisar uba shimti ïa ine i khun sim u la ïathuh ba kumba dei ka rukom ba hadien ba ki mrad khlaw la wan aiti sha ka tnad ka dei ka bynta jong ki ban phah eksamin ïa ki sha ki doctor khnang ban pynthikna ba ki don ha pdeng ka met kaba koit ba khiah.
