Bteng biang ka jingtwa khyndew bad jyrsieh ha surok bah NH-6 hajan tunel ha Sonapyrdi

Khliehriat Jylliew 15: ka jinghap bad twa ka khyndew bad ki maw ka la bteng biang mynta ka janmiet sngi palei ha jan ka tunel ha Sonapyrdi, East Jaiñtia Hills District, kane ka la wanrah biang ia ka jingdheng kali kaba jur bha ha katei ka thaiñ ha Narpuh, ka khyndew, ki maw bad ka um kaba tuid lat-lat ka la lynshop ia ka surok national highway hajan ka tunel.
Ki thymmei khubor ba la ioh lum, ki iathuh ruh ba ki pulit kim shah shuh ia ki kali ban ieng halor ki jingkieng kiba don ha Sonapyrdi, kane ka dei ruh ka jingkyntu jong ka Khasi Students Union Narpuh Circle, kaba la ju kyntu man ka por ia ki bor district bad ki bor pulit ba kin nym shah ia ki kali ban ieng halor ki jingkieng, namar ka jingpynieng kali halor ki jingkieng da ki bun kynta ha ki por ba dheng kali, ka lah ban wanrah ia ka jingtor bad jingjulor ki jingkieng.
Wat hapdeng ka jingther jur u slap, ki nongtrei jong ka National Highway Authority of India katba lah, ki la shim khia bad pynkhuid ia ka surok, kumjuh ruh ki pulit jong ka Lumshnong Police Station lem bad ki pulit jong ka Umkiang Patrolling Post ki la shim khia ha kaba pyniaid beit ia ki kali bad kumjuh ruh ki la long peitngor bad peit perman ha ka iaid ka ieng jong ki paidbah ha ka thain.
Na ka liang ka tnat pulit jong ka East Jaiñtia Hills District, kumjuh ruh na ki bor synshar district jong ka East Jaiñtia Hills District, ki kyntu ia ki paidbah kiba dei iaid lyngba na ka surok National Highway-6 na East Jaiñtia Hills District, khamtam ka thaiñ Narpuh ba ki dei ban da long adkar bha ha ka rukom ñiah kali, la kyntu ia kiba ñiah kali ba kim dei ban ñiah stet ia ka kali.