Leit pynïasoh u samla Givenson Suting bad ka Bengaluru FC, kitbok ka Demthring SC

Jowai, Jylliew 15 : Ka Demthring Sports Club ka kitbok kitrwiang ïa u Givenson Suting uba la mih noh na ka ïing ka sem bad ka Shnong ka thaw mynta ka step 15 tarik u Jylliew ban leit pynïasoh noh bad ka Bengaluru FC ba un shah hikai hapoh ka Academy jong ka.
U Givenson Suting u dei u khun jong u ma Iengskhem Ryngkhlem bad ka kong Banlam Suting kiba shong ba sah ha ka shnong Demthring, West Jaiñtia Hills District. U long u khynnah skul uba ju pule ha North Liberty Higher Secondary School, Jowai naduh Class- III haduh Class- VII.
Kane ka skul ka la ïoh bha ban saiñdur ïa u naduh ka pule puthi haduh ka jingïalehkai Football. Kumjuh ruh u long u khynnah uba ju ïoh jinghikai na kiwei de ki coach kiba don ha ri lum Jaiñtia. “U Givenson ula ju mihkhmat ïa ka Demthring Sports Club ha ka Under-12 bad Under-13.
Ka jingleit pynïasoh jong u bad kane ka club (Bengaluru FC) kaba paw hapoh ka ri India jong ngi ka long ka jingkyrkhu ïa u ha kaba un nang ïoh shuh shuh ïa ka jinghikai kaba kham biang.
Na ka liang ka Club ka kitbok kitrwiang ïa u ba un ïoh ka met kaba koit ba khiah khamtam ba un nang lah ban pyndonkam hok ïa ka sap ba u la don” pynpaw ka kyrwoh na ka Demthring Sports Club.