Pynlong ka DMC-EJHD ia ka prokram kyrpang ‘Jan Bhagidari’ kum shibynta jong ka G20

Khliehriat, Jylliew 14: Ka ophis jong u District Mission Coordinator, Samagra Shiksha Abhiyan East Jaiñtia Hills District, hynnin ka sngi ka la pynlong ia ka prokram kaba kyrpang, ka ‘Jan Bhagidari’ ha Khliehriat West Community Hall, kane ka long ruh kum shi bynta jong ka G20-2023, ha kane ka prokram la wan ban ia shim da ki khynnah na ki 20 tylli ki skul kiba don hapoh ka district.
Haba kren kum u kongsan, u ADC ka East Jaiñtia Hills District, u bah A.nongbri, MCS, u la pynshlur bad ai mynsiem ia ki khynnah suk ba ki dei ban long kiba trei shitom bad kiba minot ha ki jingpule, kumjuh ruh ban pyn tbit ia lade ha kino kino ki sap ba ki don, u la ai ruh ka jingkhublei ia ka ophis jong u District Mission Coordinator, kaba la lah ban pynlong ia kane ka prokram kaban iarap shibun ia ki khynnah ba kin tei ia ka lawei jong ki lyngba ki sap ki phong namar ha kane ka prokram ka don bunjait ki jingiakop ha kaba ki khynnah ki hap ban iakhun ban ioh ia ka jingjop.
Ha kane ka prokram, ka ophis DMC East Jaiñtia Hills District ka la pynlong ia ka jingiakop shna tiar, ki tiar jinghikai (TLM), ka jingiakop dro dur, ka jingao rong (painting), kynthup ruh ka jing dro dur bad ai rong ha ka kynroh (Wall painting), ka jingiakop shad tynrai bad kiwei kiwei, la ioh ruh ia ka jingpynshai kaba long kum ka khana lyngkot, kaba batai lyngkot shaphang ka G20.
Ka skul Moolimen RMSA Secondary School Sakhaiñ, ka la ioh rah ia ka nam lahduh ha ka jingiakop shad tynrai, bud ba ar sa ka skul ka Ambrose Memorial Secondary School, Khliehriat bad kaba wan ba lai ka dei ka skul Sutnga RMSA Secondary School, Sutnga. Ha ka jingiakop dro dur ha kynroh (Wall painting), ia ka nam lah duh la rah da ka skul ka Star Public School, Lumshnong, kaba wan ba ar ka dei ka skul Ambrose Memorial Secondary School, Khliehriat bad kaba wan ba lai ka skul KhatsooRipnar Brightstar Secondary School, Dkhiah.
Ha ka jingiakop shna tiar (Art and Craft), ka skul kaba rah ia ka nam lah duh ka dei ka Moolimen RMSA Secondary School, Sakhaiñ bud sa ka skul Sutnga RMSA Secondary School bad kaba ioh ba lai ka dei ka skul Lumjingshai Secondary School, Tluh.
Ha ka jingiakop shna tiar hikai (TLM), ia ka nam lah duh la ioh rah da ka Star Public School, Lumshnong bud sa ka Little Star Secondary School, Lad-Rymbai, kaba la ioh ba ar bad ka Ambrose Memorial Secondary School, Khliehriat, kaba ioh ba lai.
Ïa ka prokram la pyniaid da u District IE Coordinator, East Jaiñtia Hills District, u bah Salanbor.D.Kamar bad la pynkut ia ka prokram da ki kyntien ai khublei na ka District Pedagogy Coordinator, East Jaiñtia Hills District, ka kong Manbha Suja.