Nongstoiñ, Jylliew, 14: Ka jingdon jong ki nongtrei ha ka ophis jong ka Khasi Hills Autonomous District Council ha Nongstoiñ ka la duna bha ha kine ki san snem. Hynrei ki paitbah ki ba leit donkam ha katei ka ophis ki la nang bun katba nang mih ki sngi bad ka jingduna nongtrei ka pynsahteng ïa shibun ki kam jong ki paitbah.
U bah L.Goodlederson Nongsiej MDC barim ka Nongstoiñ haba ïakren bad u nongthoh khubor, u la ong ba ha ki snem ba u long kum u MDC u la ïaleh katba lah ban pynbiang ïa ki nongtrei ha katei ka ophis. Ha ka por jong u ki la don haduh khat ar ngut ki nongtrei, hynrei hadien ba um shym la jop shuh ha ka election MDC ha u snem 2019, ki nongtrei ha katei ka ophis ki nang jah suki suki bad mynta ki don satang saw haduh san ngut.
U bah Nongsiej u la ong ruh ba lada ka KHADC ka kwah ba ka jingtrei kam ha katei ka ophis kan bit kan biang bad ka kham sted, ka la dei ban pynbiang ïa ki nongtrei kumba ka long ha ka por jong u. Nalor kata u la ong ba ka jingleit donkam jong ki briew ha katei ka ophis kam long shuh kum ha ki snem ba mynshuwa, hynrei ki paitbah ha kine ki sngi ki kwah ba shisien ba ki la leit ki nongtrei ki dei ban pyndep ïa ki kam jong ki ha kajuh ka sngi.
U bah Nongsiej u la kyntu ïa ka Khasi Hills Autonomous District Council Shillong bad ia u Chief Executive Member, ba un shimkhia bad pynbiang ïa ki nongtrei ha katei ka ophis na ka bynta ka jingmyntoi jong ki paitbah jong ka West Khasi Hills District.
