Nongstoiñ, Jylliew 12: Ki riew pawkhmat jong ka thaiñ Rambrai hapoh ka jingïalam jong ka kong Aicifull Kharmusulman, ha ka sngi nyngkong ki la leit ban ïakynduh ïa u bah Garod LSN Dykes Deputy Commissioner jong ka West Khasi Hills District, ban pan jingshai haba ïadei bad ki ar tylli ki block ophis kiba la plie thymmai naduh u snem 2022, kaba kynthup ïa kaba don ha sor Rambrai bad kaba don ha shnong Nonglang.
Katei ka longkmie kaba dei ruh kawei na ki shakri paidbah kaba la paw bha ha ki kam trei mon sngewbha ha imlang sahlang, ka la ong hadien ba ki paidbah ki la sakhi ïa ka jingplie paidbah jong ka sorkar ïa ki ar tylli ki ophis block kaba kynthup ïa ka Ri Muliang C&RD Block kaba don ha ka thaiñ Langpih bad ka Rambrai Block la ap khmih lynti ba kan pynsuk shibun ïa u paidbah.
Hynrei, kitei baroh ar tylli ki Block kat haduh mynta mynne kim pat lah ban treikam pura ha baroh ki liang. Kane ka jingpynslem jong ka sorkar ban pynbiang ïa ki jingdonkam ka long kaei kaei kaba pynduh nong shibun ïa ki paidbah jong ka thaiñ. Namar bun ki la leit donkam ha katei ka ophis pynban ki la hap ban phai thylli bad la shu sep ei tang ka por bad ka bai kali, ong ka longkmie.
Ha katei ka jingleit ïakynduh ïa u DC Nongstoiñ, la ïadonlang ruh u bah Spasterlin Nongrem Secretary ka shnong Mawïamsyiem, u bah Piïon Ramri sordar shnong Nongkdait, u bah Phangstar Nongsiej Sordar ka shnong Mawphansien bad kiwei kiwei.
Kumban shu pynkynmaw ba ka sorkar MDA I hapoh ka jingïalam jong ka seng NPP, ha u snem 2022 ha shuwa ban poi ka samoi election MLA 2023, ka la plie ïa kitei ki ar tylli ki block thymmai kynthup ïa ka Rambrai C&RD block kaba don ha sor Rambrai bad ka Ri Muliang C& RD Block ha ka shnong Nonglang.
Phewse kitei ki Block ophis haduh mynta kim pat don ki nongtrei kiba pura bad ka dang dkoh shibun ha ka rukom treikam, namar ka jingbym pat thung ïa ki nongtrei bapher bapher bad shibun kiwei kiwei ki jingdonkam. Ka kong Kharmusulman ka la ong ruh ba yn buddien ïa kane ka kam kat haduh ban da seisoh.
Shuh shuh, ka la ong ruh ba ka thaiñ Langpih ka la donkam kawei ka jaka kynshew pisa ne ka Bank, namar ki paidbah kiba ioh ban die wat tang khyndiat u sying bad u synsar, ki hap ban wan thep shaduh Nongstoiñ. Nalor kata ki tymmnen ki kro ruh kiba ïoh ïa ka bai bam tymmen kiba la ïoh tang 500 tyngka na ka sorkar, ki hap ban wan shim naduh Nongstoiñ bad ki hap ban pynlut haduh 300 spah tyngka tang ka bai kali ban wan shim ia ka 500.
