Ka jingpang sniang, masi bad dohkha ka jia tang ha Meghalaya ne kiwei ruh ki jylla- kylli ka UDP

Shillong, Jylliew 11 : Ka UDP Mawlai Circle ka la pynpaw ïa ka jingsngewkhia halor ka jingphriang jong ka jingpang sniang (African Swine Fever) bad ruh ka jingpang masi ba la tip kum ka jingpang at sniehdoh ha ka masi nalor ka jinglap ïa ka formalin ha ki dohkha ba shalan na shabar jylla.
Ha ka kyrwoh ba pyllait ha kane ka sngi U Blei, u nongïalam ka UDP na Mawlai, Bah Process T Sawkmie ba dei ruh u MLA barim, u la ong ba ki paidbah ka jylla ki kwah ban tip la katei ka jingphriang jong kitei ki jingpang jong ki mrad ka jia tang ha Meghalaya ne ka jia ha kiwei ki bynta jong ka Ri ruh kumjuh.
U ong ruh ba u Myntri ka tnad Animal Husbandary bad Veterinary u la bthah ïa ki doktor na ka tnad ba kin wad ïa ka daw jong kitei ki jingpang hynrei tad haduh mynta ki doktor veterinary kim pat lah ban ai jingtip ei ei halor katei ka phang lane ai jingbthah ïa ki paidbah kiba leh ïa ki kam khaïi.
U Bah Process u la buh jingkylli ruh ïa ki lad jingïada ba la shim da ka tnad ban ïada ïa kitei ki jingpang ba kan ym phriang bad ong ruh ba ki paidbah ka jylla ki la kynduh jingeh haduh katta katta namar ïa ka doh sniang ruh kim lah ban bam, ka doh masi ruh kim lah bad wat mynta ïa ka dohkha ruh kim lah.
Shuh shuh utei u MLA u la ong ruh ba ka tnad Fisheries ka la dei ban wad ïa ka daw la ki nongkhaïi doh kha ki la injek shisha da ka formalin sha baroh ki dohkha ba wanrah na shabar ka jylla.
“Ka tnad Fisheries ka la dei ban kyndit thiah bad treilang bad ki nongkhaïi dohkha ha iew ym tang ha nongbah Shillong hynrei ha baroh ki 12 tylli ki distrik ban lad ïa ka daw la ki nongkhaïi dohkha na shabar ki pyndonkam da ka formalin ban pynneh ïa ka dohkha ba wanrah na shabar,” u la ong.
U ong ruh ba ki heh ka tnad Fisheries ki hap ban trei shitom bad pyntikna ba ki dohkha ba wan na shabar ka jylla ki dei ban long kiba bit ban bam lym kumta ka tnad ka hap ban sangeh noh ka shalan dohkha na shabar na ka bynta ka koit ka khiah jong ki paidbah ka jylla.