Pynliem ka Shillong Lajong ïa ka Rangdajied, da ka said jop ka Mawlai ïa ka Khliehmawlieh

Shillong, Jylliew 11 : Ka Shillong Lajong FC ka la jop da kaba pynliem da 3-0 ïa ka Rangdajied United FC ha ka jingïakhun ïa ka semi-final kaba nyngkong (leg 1) jong ka Meghalaya State League 2023 kaba la long ha ka sngi Saitjaiñ jong ka taïew ba dang shu dep ha madan Kiang Nangbah Stadium, Jowai, katba Mawlai SC ka la jop da ka said ïa ka Khliehmawlieh kata da 1-0 ha katei kajuh ka sngi ha ka jingïalehkai ha Tura.
Baroh saw tylli ki kynhun kin sa ïoh ban ïakhun biang sa shisien ha ka semifinal kaba ar (leg 2) kaban sa long ha ka 13 tarik Jylliew. Watla kine ki ar tylli ki team ki la mad nam rem, hynrei ki dang don pat ka jingkyrmen ban ïalehkai bha ha ka semifinal kaba ar.
Haba phai sha ka jingïakhun ha Jowai, ka Shillong Lajong FC kala ïoh ban thep ïa ka kol kaba nyngkong lyngba u Henry Ford Nongneng ha ka jingïalehkai kaba dang ïaid 17 minit, u Hardy Cliff Nongbri ula thep ïa ka kol kaba ar ha ka minit ka ba 55 katba ïa ka shi kol ka Shillong Lajong ka la ïoh ei na ka jingbakla thep hi u rangïalehkai ka Rangdajied ha ka kylla miet kaba la ïaid 82 minit.
Ka jingïalehkai hapdeng kitei ki ar tylli ki team ka long kaba shongshit bha na ka jingwan sakhi ki paidbah kiba la wan poi na kylleng ki jaka. Ha ka minit ba 78 ka Rangdajied Unitd FC ka la hap ban ïalehkai tang 10 ngut hadien ba u Aibiangmame Nengnong ula ïoh pdiang ïa ar tylli ki Yellow Card bad la phah mih noh ïa u na ka madan ïalehkai.
Kumta lyngba kane ka mad nam rem ka Rangdajied kan hap ban ïalehkai bha ha ka wat ka ba ar kaban long ha Mawkyrwat.
Haba phai pat sha ka jingïakhun ha Tura, kaba la pynlong ha PA Sangma Stadium ka Mawlai ka la jop da ka said da 1-0 ïa ka Khliehmawlieh hapdeng ka jingwan sakhi lang ka MP jong ka Tura ka Agatha Sangma kaba la long kum ka Kongsan, ha ryngkat ki paidbah naduh ki longkmie longkpa, ki samla shynrang bad kynthei haduh ki hep kiba rit.
Ka jingïakhun hapdeng kine ki ar tylli ki team ka la long kaba ïakhaid bha khamtam ha ka jingïalehkai jong ka kylla step, hynrei dei ha ka jingïalehkai jong ka minit kaba 50, ka Mawlai ka la ïoh ban lehkmen hadien ba u Wanboklang Lyngkhoi ula ïoh ban pynthih jar. Bad dei tang katei ka shi kol ba ka Mawlai SC ka la ïoh ban khur ïa ka jingjop ha katei ka semifinal kaba nyngkong bad ka Khliehmawlieh ruh ka la lah ban ïalehkai bha.
Kine ki ar tylli ki team, kin mih madan biang ha ka semifinal kaba ar kaban sa long ha nongbah Shillong ha ka sngi Ba ar.