Lashai ka sngi yn sdang ka jingïakren ki bor pahara khappud ka India – Bangladesh ha Delhi

Shillong, Jylliew 10 : Ka jingïakynduh lang jong ki hehduh ki shipai pahara khappud ka India bad Bangladesh ïa kaba la tip kum ka 53rd Director General Level Border Co-ordination Conference, kan long ha BSF Camp Chhawla, New Delhi naduh ka 11tarik haduh ka 14tarik u Jylliew mynta u snem.
Ha katei ka jingïakynduh lang, ïa ka kynhun jong ka BSF yn ïalam da u Dr. Sujoy Lal Thaosen, Director General ki BSF katba ïa ka kynhun na Bangladesh pat yn ïalam da u Maj General AK Nazmul Hasan, BAM, ndc, psc, Director General, Border Guard Bangladesh.
Katei ka jingkynduh lang ka long ban ïa kren na kabynta bun ki mat kiba ïadei bad ki kam khappud khamtam eh haba ïadei bad ka jingpynkhlain ïa ka jingïatrei lang hapdeng ki bor pahara jong kitei ki ar tylli ki ri ba marjan.
Ha katei ka Conference, ka jingïakren ka long ruh kumno ban tehlakam ïa ki kam bymman kiba don ha ki khappud bad ruh ka jingpyntip mar kylliang hapdeng ki bor pahara haba don kino kino ki jingjia ha ki khappud.
Nalorkine, la ong ba kan don ruh ka jingïakren halor ki kam pynroi ha khappud bad ruh haba ïadei bad ka jingpyntreikam pura ïa ki ïa kiba la tip kum ki Coordinated Border Management Plan (CBMP) bad ka Confidence Building Measures (CBMs). Lah ban kdew hangne ba ka jingïakynduh lang kaba khatduh hapdeng ki BSF-BGB Border Co-ordination Conference ka la long naduh ka 17tarik haduh 21tarik u Naitung u snem ba la dep ha Dhaka, Bangladesh.