Khliehriat jylliew 10: Kum ka dak ban pyndonburom ia ka Sngi burom mariang lane ka sngi pynneh mariang (World environment Day), Ki khynnah jong ka skul Khliehriat Higher Secondary School hynnin ka sngi saitjaiñ, ka la pynlong ia ka jingpyni paitbah ha Khliehriat, da ka drama ha surok,(Street Play) ha Lad Pohshnong (Khliehriat East).
Ia kane ka prokram lyngkot la pyniaid da u babu Manlang War ryngkat bad u Vice-Principal, u Fr. Mark SDB.
Ki khynnah skul ki la ia pyni ia ka sap ka phong ha kaba ki pyni da ka drama kumba ki leit sha ki iew kiba don ki nongshong ïeww ki plie bad sa wan ki nongwan iew bad kin sa mih ki jingjakhlia na ka iew ka hat khamtam ki plastic ha kaba khlem don ba pynkhuid hynrei don tang ki nong pynjakhlia, hynrei watla katta ruh ki dang don hi kiba dang don ka mynsien tipbriew tipblei kiba peit ba bishar bad kiba don ka jingkitkhlieh ki ban pyntip sha ki bor shnong.
Ha ka drama, la pyni ruh ba ki bor shnong ruh ki kloi ban pynkhuid pynsuba ia ka shnong ka thaw, hynrei wat hapdeng ka jingkhuid jingsuba ruh ki ba juh mlien te ki nang bteng pat ia ka jingpynjaboh, kane ka pynbor ia ki bor shong ban khot biang da ka dorbar ban pynkhuid bad ki ai ruh ia ka jingtip paidbah (awareness) ryngkat bad ka kam, ia kane ka drama surok la wan ruh ban sakhi lang da ki paidbah.
Ka long kaba itynnad ba ki don katto katne ki khynnah skul ba ai jingkren ha kaba iadei bad ka phang kumno ban ri bad ban sumar ia ka mei mariang bad kban lehkhuid leh suba
U babu Manlang uba pyniaid ia kane ka prokram ruh u la ai jingkren hashwa ban pynkut ia kane ka drama bad ong ruh ba ka jingroi ka jingjakhlia ha shnong ha thaw ka dei na ka daw ka jing bym don ka jingkitkhlieh jong ngi ki paidbah nongshong shnong, u la kyrpad ia ki paidbah baroh kumjhuh ruh ia ki khynnah skul ba ki dei ban long ki nongshong shnong kiba don ka jingkitkhlieh ban wanrah ia ka khuid ka suba.
