Pdiang ka VPP ïa ka Search Committee ka sorkar, yn buddien ban pynsted ïa ka jingdawa

Shillong, Jylliew 08: Shisngi hadien ba ka sorkar ka la pynbna ba ka la thaw ïa ka Search Committe ban wad ïa ki riew shemphang ban long ki dkhot jong ka Expert Committe ba ka sorkar ka la thung ban pynbeit thymmai ïa ka Reservation Policy, na ka liang ka VPP ka la pynpaw ba ka pdiang ïa kane ka senjam ka sorkar.
Ha ka jingïakren sha ki lad pathai khubor, u President ka VPP u Bah ardent u la ong ba ka party hi ka pdiang ïa kane ka rai ka sorkar ban thaw ïa kane ka komiti na bynta ban wad ïa ki riew shempahng ba kin long ki dkhot ha ka Expert Committe na bynta ka jingpynkylla ïa ka Reservation Policy.
“Ngi pdiang ïa kane bad ngin ïai buddien na ka liang jong ngi ba ka kam kan ïaid sted ha kaba ïadei bad kane ka jingpynkylla ïa ka Reservation Policy bad ngin ym ap haduh ba ka sorkar kan khot biang ïa ka jingïalang ka All Party Meeting hynrei ngin phah jingthoh sha ka sorkar ha kaba ïadei bad kane,” u la ong.
“Ngi shniah ha ka komiti ba u Chief Secretary u khlieh ban wad ïa ki riew shemphang bad ngim kwah ban ong mano ba dei ban ïohrung bad mano bym dei bad ai kane ka komiti kan leh la ka bynta,” u la bynrap
Haba kylli haduh katno u sngew skhem ba ka jingthung ka sorkar ïa kane ka Expert Committee kan seisoh namar kiba bun ki komiti ba ka sorkar ka la thung la ïohi ba ki kut tang ha suiñ khlem lah pynmih soh eiei, na ka liang u Bah Ardent u la ong ba ka party hi ka don ka jingsngewkhem ba ka sorkar kan pynsted ïa kane ka kam bad ‘ba kane ka komiti ba la thung kan ym shu sepei hynrei kan don kla jingmih soh,” u la ong.
“U paidbah u la kyrshan katto bad ka sorkar kam dei ban shim sting ïa kane ka bad ngi don ka jingngeit kaba skhem ba kane ka komiti kan ym shu kut kum kiwei pat ki komiti bad ngi ruh ngin ïai buddien.” u la bynrap.
Haba kylli la u ïohi ba ka donkam ne em ba ka sorkar kan pynmih ïa ka hukum ba ka Job Reservation Policy kan treikam ha ki kompeni shimet, u Bah ardent u la ong ba ka party ka seng donkam ïa kane.
“Ka jingïakhun jong ngi kam dei eh ban pynïoh kam sorkar bad wat ha ki kompeni shimet ruh lehse dei ban bhah bad kane nga ieh ha ka jingstad jong ka Expert Comittee,” u la ong. Haba kylli la ka jingkyrshan ka dei ba ki samla kin ïoh jingmyntoi na ka Reservation Policyha ka kam sorkar u Bah Ardent u la ong, “Naduh kaba sdang ngim shym ong ba lada pynbeit ïa kane ka polisy baroh kin ïohkam sorkar lut hynrei ngi kwah ba ka jingduna ba don ha ka polisy yn weng bad ka bhah dei hok jong ki khun samla ki dei ban ïoh bad ki samla bad ki paidbah hi ki sngewthuh shai ïa kane,” u la ong.
Haba ïadei bad ka jingkynthoh ba ka jingdawa ka VPP ban pynbeit ïa ka Reservation Policy ka wanrah ïa ka msyniem ïashun bad ka bet ïa u symbai ïapher jaidbynriew, “Kin ym lah ban ïai ïalam bakla ïa u paidbah namar u paidbha u la stad bad u lah ruh ban pynuïapher ïa ki jingshisha bad ki kam thok bad ban ong ba ka bet ïa u symbai ïashun ka dei ka jingkren kutlad ban ïalam bakla da mano re,” u la ong.
“Ngim bet ïa u symbai ïashun hynrei ngi pynleit jingmut ïa ka bit ka biang ki paidbah ka jylla khamtam ki khun samla,” u la bynrap.
Haba kylli halor ka rai ka sorkar ban bteng biang noh ïa ka jingthep kam ha ki tnat sorkar tang shu pynmih ïa ka Office Memorandum kaba thymmai ïa ka Reservation Roster bna ka liang u Bah Ardent u pynpaw ba ka VPP ruh ka mynjur ïa kane.
“Ngim don jingpyrshah eiei lada la pynbeit ïa ka jingdkhoh ha ka Roster namar lada shu pynjlan ka dei ka jingshisha ba ki samla ki lah ban kynjoh sha ka rta ba kim lah shuh ban aplai kam sorkar bad ngi shniah ha ka sorkar ïa kane bad ngim dei ban don than ka mynsiem pyrkhat sniew,” u la ong.