Ym don jyrsieh halor ka jingkurup ïa u khaw 1lak byrni da ki pulit Assam : ong u Myntri

Shillong, Jylliew 07 : Ka kynhun tohkit laitluid halor ka jingshah kurup haduh 1lak byrni u khaw ha ki pulit Assam ka la kam ba ki jingkynnoh ba ka don ka jyrsiew khaw, kadei ka jingkynnoh kaba ym don nongrim haei haei ruh.
Haba pyntip ïa kane, u Myntri ka tnad Social Welfare, Bah Paul Lyngdoh u la ïathuh ruh ba ki la ïoh ïa ka kaiphod halor katei ka jingtohkit.
“Katkum ka kaiphod, baroh kitei ki jingkynnoh ba don ka jyrsieh halor utei u khaw kadei ka bym don nongrim ba kam don satia kano kano ka jingshisha halor kitei ki jingkynnoh,” u la ong. Nalorkata u la bynrap ruh da kaba pyntip ba ïa kane ki la phah ruh sha u Advocate General jong ka jylla bad na ka liang u AG ruh u la kren shai ha ka jingkdew ba kitei ki jingkynnoh kim don nongrim ei ei bad kumta ym lah satia ban kynnoh ba kadei ka jyrsieh.
Na ka liang u Myntri u la ong ruh ba hadien ba na ka liang ka Law Department bad ruh na u AG ki la kdew ïa ka jinglap jong ki, u Myntri u la ong ba ka paw ba katei ka jingjia ka slem na ka daw ka jingbym donlang ka jingïatrei lang bad ki pulit Assam. Kumta, nga lap ba nangne shakhamt dei ban don noh da ka por ban tohkit khnang ba kito kiba ngat ha ka jingshah kynnoh ba ki donkti ha ka jyrsieh bad kumjuh ka Department kin ym shah kynthoh khlem nongrim.
Haba pynshai pat halor ka jingkylli kumno utei u khaw u poi sha Assam, u Myntri ula ong ba katkum ki kot ki sla kadei tang na ka daw ka jaka kaba khlem da kdew bad kumta ïa katei ka jingjia la aiti noh sha ki pulit Assam bad hadien ba la tohkit pat bad katkum ka kaiphod tohkit, ka file ka la ïaid lyngba ka Law Department bad Advocate General bad ka la paw shai ba kam shym la don satia kano kano ka jyrsieh.