Shillong Jylliew 07: Ka Ophis District School Education Officer (DSEO), South West Khasi Hills kala bthah ïa baroh ki skul jong ka District ba kin pynsangeh shuwa shipor ïa ka jingpynïeng laiñ mynstep ia ki khynnah skul ne Assembly namar ka jingshit kyrang palat ka sngi.
Ka Ophis kala phah ïa kane ka jingbthah sha baroh ki Principal/Headmaster/Headmistress jong ki skul hapoh ka District kiba kynthup naduh ki skul Higher Secondary, Secondary, Upper Primary bad Lower Primary.
Kat kum ka jingbthah la ong ba ki skul kin pynsangeh shuwa ha kine ki khyndiat sngi ïa ka jingpynieng laiñ ïa ki khynnah khamtam ki skul ha ki jaka khappud bad ka Bangladesh haba buh hakhmat ïa ka koit ka khiah ki khynnah tad haduh ba ka suiñ bneng kan long kumba ju long barabor.
Kane ka jingbthah kala mih hadien ba ka seng Khasi Students Union-South West Khasi Hills ka la phah ïa ka dorkhas sha ka Sub Divisional School Education Officer (SDSEO) ka South West Khasi Hills ba buh ïa kane ka jingkyrpad.
Katkum ka dorkhas kaba la phah da u Chairman ka Education Cell u samla Evansroy Nongrem bad u Secretary ka Education Cell u samla Episcopal Lyngdoh ki la kyrpad ban pynsangeh shwa shipor ha kaban pynïeng laiñ ïaki khynnah skul shwa ban long skul ne Morning Assembly namar ka jingshit palat jong ka sngi bad bun ki kmie ki kpa kila pyntip sha ka seng ba don ki khynnah kiba kyllon bad ïoh pang.
Ka seng KSU kala kyrpad ban shimkhia lem ïa kane khamtam eh ïa ki skul kiba don ha ki thaiñ khappud.
Ha kajuh ka por, ka DSEO kala bthah ruh ba ki bor skul ki dei ban pynthikna ba ki khynnah skul ki dei ban dih thikna ïa ka um bad lada jia ba don kino kino ki khynnah skul ki ïoh pang dei ban rah mardor ïa ki sha ki jaka sumar.
