Shillong, Jylliew 06: Ka jingïakren ïasuk ne formal peace talk ka sorkar jylla bad sorkar India bad ka HNLC kaba la buh por ban sdang noh ha ka taiew ba nyngkong mynta u bnai ka la kham slem noh khyndiat namar ka jingmih ka jingïakynad ha Manipur ha kaba ki ophisar ka Ministry of Home Affairs ki la bunkam noh ha katei ka ma, ïathuh u Myntri Rangbah ka jylla.
Haba kren sha ki lad pathai khubor u Myntri Rangbah ka jylla u Conrad u la ong, “kumba ngi tip baroh ïa kaei kaba la jia ha Manipur bad ki ophisar ka MHA kiba dei ban don bynta ha ka kam ïakren ïasuk bad ka HNLC ki la bunkam noh ha katei ka jingjia ha Manipur na kata ka daw ka por ba ngi la buh ba ka jingïakren ïasuk kaba dei ban sdang noh ha ka taiew kaba nyngkong mynta u Jylliew ka la kham slem noh hynrei na ka liang ka sorkar jylla ka ïai bteng ban ïa syllok bad ka MHA ha kaba ïadei bad kane,” ong u Conrad.
U Myntri Rangbah u la ïathuh ba na ka liang ka sorkar pdeng ruh ka don ka jingthrang kaba shida ban sdang noh ka jingïakren bad ka HNLC ‘bad ngi kyrmen ba kane ka kam kan ïaid noh sha khmat ha kine ki khyndiat sngi ban wan,’ u la ong.
