Shillong, Jylliew 6 : U Myntri Rangbah ka jylla Meghalaya u Conrad K Sangma bad u Myntri Rangbah ka Assam u Himanta Biswa Sarma kin leit jurip lang ïa ki jaka ha Block I ha West Jaintia Hills bad Karbi Anglong shwa ban kut mynta u bnai Jylliew.
“ Ka jingleit jurip lang jong ngi baroh arngut sha ka thaiñ Block I ha West Jaintia bad Karbi Anglong kan long shwa ban kut une u bnai hi” ong u Myntri Rangbah.
U la ïathuh ka jingleit jurip ka long ban bishar bniah ïa ki jaka bad khamtam ban pynthikna ruh ba ka jingshong shngaiñ kan wan phai hapdeng ki paid kiba sah ha kitei ki jaka. “ Ka jingthmu ka long ban wanrah ka jingshaniah ha ki paidbah bad kumjuh ruh kan long kum ka khubor ïa ki paid khappud ba ngi shim khia ban pynbeit noh ïa kane ka jingeh kaba la sahteng da ki phew snem mynta ha khappud jong ki ar jylla” ong biang u Conrad.
Ka jingïalang ba nyngkong eh ban ïakren halor kane ka jingpynbeit ïa u pud u sam ka la dep long ha ka 24 tarik Jymmang ha nongbah Guwahati.
Dei ha kane ka jingïalang ba ki ar myntri rangbah ki la shim rai ban leit jurip sha kitei ki jaka ha West Jaintia bad Karbi Anglong ban wanrah ka jingshaniah ha ki paidbah. Dei ruh ha kane ka jingïalang ba ki la rai ba ki Regional Committee jong ki ar jylla kin sdang ban ïa kynduh bad leit jurip ïa ki jaka ban ïa pynbeit ïa u pud u sam. Ha kane ka jingleit jurip jong ki ar myntri rangbah ki lah ruh ban leit sha Mukroh ka jaka kaba don hapdeng ka jingïa kulmar kaba na ka por sha ka por.
Ki ar myntri Rangbah ki kwah ban ïa pynbeit ïa u pud u sam da ka jingiasngewthuh jingmut lang jong baroh arliang. Kine ki Regional Committee kin pyndep ïa ka jingleit jurip ïa ki jaka bad ai ïa ka kaiphod sha ki ar sorkar haba kut jong u Naitung bad hadien kane ki ar myntri rangbah kin sa ïa kynduh biang.
