Shillong, Jylliew 06: U Myntri Rangbah ka Jylla Conrad K Sangma ha ka sngi Ba-ar, u la pynbna ba ka Sorkar Jylla kala shim rai ban pynkha noh ïa ka Directorate of Forensic Science hapoh ka Jylla.
Haba kren sha ki lad pathai khubor hadien ba la wai ka jingïalang ka Kynhun Myntri, u Myntri Rangbah ka jylla u la pyntip ba ka Kynhun Myntri ka la pdiang ïa ka jingtyrwa ban pynkha thymmai ïa ka Directorate jong ka Forensic Science kaba pura na ka Cell jong ka Forensic Science kaba treikam hapoh ka jingkhmih jong ka Tnad Meghalaya Police naduh ki snem kiba kham mynshuwa.
U Myntri Rangbah ula ong ba kat kum ka jingbthah ka Human Rights Commission, ka Jylla ka donkam ban pynkha la ka jong ka Directorate jong ka Forensic Science khnang ba kan treikam laitluid bad lait noh na ka jingkhmih ka Police Headquarter. Ula pyntip ba kane ka Directorate kan hap hapoh ka Tnad kam pohiing ka Jylla. U Myntri Rangbah ula ïathuh ba ki briew/Nongtrei bad ki jingdonkam baroh kila don lypa ha ka cell hynrei kaba donkam ka long satang ïa ka bor pynïaid (Administrative) ba lah ban shim rai kaba hap ban pyndap ha kane ka Directorate.
