Nongstoiñ, Jylliew 6: Ka Hill Farmer Union (HFU) West Khasi Hills District ka pynpaw ïa ka jingsngew synei ïa la ki para Nongrep kiba la sngew khuslai namar ka tyrkhong khlem slap ha kine ki sngi ki taiew hapoh West Khasi Hills.
Ka HFU ka la ong mynshuwa ha kine ki por ka la dei ka por set um ïa ki pynthor ba la bet, katba ïa kiba thung la sdang thung. Hynrei mynta pat haduh mynta kiba la bet ki la tyrkhong, kiba thung lei bun ki kiba sara ki la jan ïap bad ki pynthor pat tang ka um kam don.
“Ngim kynnoh ïa ka mariang namar ka mariang ka shong ha U Blei. Ngin pdïang kat kaba u pynïaid namar u tip kham bha ban ïa ngi ki Nongrep. Ngi ngeit bad duwai ba U Blei Un ïarap ïa ngi. Ngi ju ïoh ki scheme na Irrigation, Soil bad kiwei ki Department hynrei kim da ai ka jingïarap ha kum kane ka por”, ong u Bah L.Kharsyiemlieh General Secretary HFU WKHD.
