Katba nangïaid ki sngi ka jingpyndonkam ïa ka plastik ka la nang shyrkhei bha: DC

0

Mawkyrwat, Jylliew 05: Kum ka dak jong ka jingïasnohktilang bad ka pyrthei ha ka jingrakhe ïa ka sngi pynneh pynsah ïa ka mariang ne ka World Environment Day, ka ophis jong ka Meghalaya Basin Management Agency (MBMA), District Project Management Unit, Community-LED Landscape Management Project (CLLMP), South West Khasi Hills District ha ryngkat ka jingïatreilang bad ka Nativity Higher Secondary School, Mawkyrwat ka la ïoh ban rakhe ïa kane ka sngi ba kyrpang ha kaba u bah T. Lyngwa, IAS, Deputy Commissioner, South West Khasi Hills District, Mawkyrwat u la long u konsan.
Ïa kane ka jingrakhe ïa ka ‘World Environment Day’ ka dei halor ka phang, “Beat Plastic Pollution”, ha kaba ïa ka jingïalang la pynlong ha phyllaw jong ka Nativity Higher Secondary School, Mawkyrwat ryngkat ka jingwan ïashimbynta shit rhem jong ki khynnah skul, ki nonghikai bad kumjuh ruh ki nongtrei hapoh ka MBMA.
U Deputy Commissioner ka South West Khasi Hills District, Mawkyrwat, u bah T. Lyngwa, IAS, haba kren kum u kongsan u la pynkynmaw ha ki khynnah skul halor ka jingkordor jong ka mei mariang bad ki sawdong sawkun kiba don ha ka bad ha kajuh ka por u la pashad ruh ïa ki katto katne ki kamram ba ki khynnah skul haduh ki paidbah nongshong shnong ki dei ban leh bad kumno ban tyngkai bad pynneh pynsah ïa ka mariang ha ka jingkhuid jingsuba.
Haba kren halor ka jingpyndonkam ïa ka plsatik, u bah Lyngwa u la ong ba ha baroh kawei ka pyrthei la shna haduh 400 million ton ka plastik ha ka shi snem bad ha kaba ïa dei bad ka jingpyndonkam pat ka la nang jur na ka por sha ka por, nuksa haba phai ha ki jingshna jingshna ruh kum ki shuki, ki pliang, ki shamoit bad lait noh ki tiar shet la lap ba bunsien la shna beit da ak plastik bad ka jingma halor kane ka bynta ka la ap lypa ïa u khun bynriew, ïa ki jingthaw ba im bad kumjuh ruh ïa ka mariang. Namarkata, u la ban jur ba ha kaba ïa dei bad ka jingdonkam kum ki paid nongshong shnong nangne shakhmat ki dei ban nang ban pyndonkam ïa ki plastik da kaba kin pyndonkam biang da ki juh ki plastik kat shaba ki leit ha ki jaka ïew khnang ban lait na ka jingpynjulor bad jingpynjaboh ïa ka mei mariang.
Namarkata, lyngba kane ka sngi jong ka jingrakhe ïa ka sngi pynneh pynsah ïa ka mei mariang, u bah T. Lyngwa, IAS, Deputy Commissioner, South West Khasi Hills District, Mawkyrwat u la wer la khot ïa baroh naduh ki khynnah skul, ki nonghikai skul, ki nongtrei ha ki ophis sorkar bad kumjuh ki paidbah jong ka South West Khasi Hills District ba ki dei ban don ka jingïasnohkti lang ha kaba ïa dei bad ka bynta ban pynkhie im biang ïa ka mei mariang kaba la jot la pra da kaba long kiba phikir, kiba ïaleh ban thung dieng ha ki jaka ba la sdang syllen, kiba sumar ïa ki jaka kiba la pynjulor.
Ïa ka jingïalang la pynïaid da u bah Kegitar Lyngdoh, Deputy Manager Monitoring & Evaluator (DM-M&E), ka jingkren pdiang na u Principal jong ka Nativity Higher Secondary School, Mawkyrwat, ka jingrwai kyrpang na ki khynnah skul, ka jingkren lyngkot na u bah Riban Dkhar, SM-Training Specialist bad ka jingkren khublei na ka Niwancy Bareh, Deputy Manager, Environment Management.
Hadien ka jingïalang u bah T. Lyngwa, IAS, Deputy Commissioner, South West Khasi Hills District, Mawkyrwat, ki nonghikai, ki ophisar ryngkat ka jingïashimbynta shit rhem jong ki khynnah skul ki la ïoh ban ïa thung ïa ki symbai dieng ha ki rud ki kiar jong ka skul kiba dei ki jaka ba la pynkhreh lypa.

Leave A Reply

Your email address will not be published.