Shillong, Iaiong 28: U Mytri Rangbah ka jylla u Conrad K Sangma, mynta ka sngi u la ong ba ka sorkar kan pynlut T.121 klur tyngka ban shna ïa ki ïing ophis thymmai jong ki 46 tylli ki block kiba don ha kylleng ka jylla. ïa kane la kren ha kaba buh ïa u mawnongrim ban tei ïa ka ophis thymmai ka Bajengdoba C&RD block ha North Garo Hills District.
Haba kren ha katei ka jingïalang u myntri rangbah ka jylla u la ong ba ka sorkar ka kwah ban kyntiew ïa ki kam pynroi ha baroh ki liang bad kane ka jingbuh mawnongrim mynta ka sngi ka long ban pynpoi ïa ki kam jong ka sorkar kham jan sha ki paidbah.
U Myntri rangbah la ong ba shisien ba la dep kane ka ophis kan don ka jingtrei kam kaba kham bha ha kaba ki ophisar bad ki nongtrei ruh kin sa kham sngew tynnad ban trei. Kane kan pynsuk ruh ïa baroh ki briew kiba leit ban don kam hapoh jong ka Block bad kan ai ruh ka jingshakri kaba kham bha sha ki paidbah.
Ha kane ka jingïalang u myntri rangbah u la pyntip ruh ba ka sorkar kan sa pynurlong ïa ka jingdawa ki paidbah ban kyntiew kyrdan ïa ka Bajengdoba PHC sha ka CHC, kane kan sa urlong noh shen.
Ha kane ka sngi u myntri rangbah u la leit ban jngoh ïa ka jingtrei ïa ka surok bad ïa ka Hamilton Sangma stadium kaba don ha Bakenang Nalsa,ha kane ka sngi kiba la ïa don lang ki long u Deputy Speaker u Timothy D Shira, u MLA kane ka jaka u Pongseng R Marak, u MLA jong ka Kharkutta u Rupert Momin bad u MDC barim jong ka Bajengdoba ka North Garo Hills.
