Ym ban pynkhlaiñ ïa ka KHNAM hynrei ïa ka District Council ngin ïakhun ïa ka elekshon MDC: Thomas

Shillong, Jylliew 03: U Working President ka KHNAM u Bah Thomas Passah u la ong ba ka jingthmu ka KHNAM ban ïakhun ïa ka elekshon MDC kaban sa long ha u snem ban wan kam dei satia ban pynkhlaiñ ïa ka KHNAM hynrei ka thong ka dei ban pynkhlaiñ ïa ka jingtreikam ka konsil.
Haba kren sha ki lad pathai khubor hadien ba la wai ka General Council jong ka KHNAM kaba la pynlong ha ka sngi Saitjaiñ u Bah Thomas u la ong ba ka KHNAM hi kan ïakhun ïa ka elekshon ha u snem ban wan ka dei beit ban pynkylla bak lybak na ka dur ka dar bad ka rukom long ka district council kaba ka long mynta.
“Ngin ym ïakhun ïa ka elekshon MDC ha u snem ban wan na bynta ban pynkhlaiñ ïa ka KHNAM hynrei ngin ïakhun ban pynkhlaiñ ïa ka District Council bad ban pynkylla bak lybak ïa ka rulom treikam jong ka bad ban pyndonkam hok ïa ka iktiar ba la pynkup da ka Sixth Schedule,” u la ong.
U la ong ba lada nujor tang bad ka Karbi Anglong Autonomous Council bad ka KHADC bad JHADC la ïohi ïa ka jingïapher kaba da bun shaha namar ki district council jong ngi ym shym la pyndonkam hok ïa ka iktiar ba la pynkup ïa ki.
“Ngim lah ban len ba naduh u snem 1972 haduh mynta don tang uwei shisha u nongthaw aiñ kata ka dei tang u Bah HS Shylla uba la thaw ïa ki aiñ bad ngi ai burom ïa une u rangbah uba u nongthaw aiñ ba kat u nongthaw aiñ namar ka Land Bill ba la kylla aiñ mynta dei une u rangbah ba wanrah, ka Clan Bill kaba dang sahteng mynta ruh dei une u rangbah uba la wanrah,” u la ong.
U la ong ruh ba na ka liang ka party kan pynkhreh bha ïa kane ka elekshon bad lada u paidbah u pykhamti ïa ka iktiar ban synshar ïa ka konsil kin sa ïohi shisha ïa ka jingtreikam ba don iktiar ka district council.
“Ki la don kiba wan pan tiket ruh hynrei ngin pynkhreh shuwa ïa ka mat jingkular shuwa ban ai tiket kito kiba pan tiket ki hap ban soi shuwa ïa ka jingmynjur ïa ki mat jingkular lymda kumta nga kren shai ba ym dei ban wan pan tiket tuh,” u la ong.