Shillong, Jylliew 04 : Ka synjuk jong ki trai hotel ba la tip kum ka Federation of Shillong Hostel ka la kyntu ïa baroh ba kin kiar na kaba pyndonkam ïa ki umdih ha ki bilor plastik ha ki jaka jong ki halor ka nongrim ba kane kan ïarap na ka bynta ka lawei ban wan ban lait na ka jingjur ki jaboh plastik.
Ïa katei ka rai ki la shim ha ka jingïalang ba la donlang bad ka Assistant Commissioner of Food Safety, kaba la kyrpad ïa kiba buh ïa ki jaka sah ba kin pynbiang ïa ki um kiba khuid bad buh ïa ki ha ki bitor ym ha ki bilor plastik.
Kane kadei kawei na ki rai ba la shim ha katei ka jingïalang kaba long shi bynta ban rakhe ïa ka sngi pynneh mariang.
Ha ka kyrwoh, na ka liang u President ka Federation, u Parabir S Sehdave u la ong ba kin sa sam ruh ïa ki jingtah ban tah ha ki tourist taxi ban pynsngewthuh ïa ki nongleit nongwan ban kiar na kaba bret pathar ha ki jaka paidbah bad pynsngewthuh ïa ki ban thep ïa ki shi jaka ha kali hadien ba la dep ban bam hapoh kali.
Shuh shuh la ong ruh ba kin sa kynduh ruh ïa u DTO ba kin pyntikna ba baroh ki kali tourist ba kin rah ïa ki kynja pla kiban long kum ki jaka bret niut.
Nalorkata, u ong ruh ba man ki hotel ne ki restaurant ban thung uwei u dieng ha ka 5tarik Jylliew bad ruh ban shong dur.
“Ka Federation ka pynpaw ka jingkyrmen ba ki hotel bad ki restaurant kin bud pyrkhing ïa kitei ki jingbthah khnang ba ka mei mariang kan khring ïa kiba wan kai”. Katkum ka jingong jong u, na ka liang ka NPP Shillong City Unit ruh kala snohkti lang ha kane ka bynta.
