Nongpoh, Jylliew 04 : U MLA ka Nongpoh Constituency, u Bah Mayral Born Syiem mynta ka sngi u la shim ïa ka bynta kum u nongmihkhmat ban ai khublei kyrpang ïa baroh ki paidbah ka Ri Bhoi, kaba dei halor ka jingdap 31 snem ka Ri Bhoi District naduh ba ka Ri Bhoi ka la ïoh la ka jong ka District ba pura ha ka 4 tarik u Jylliew 1992.
Wat la kane ka sngi kyrpang jong ki paidbah ka Ri Bhoi ka ïa tyngkhuh bad ka sngi u Blei, u bah Mayral Born Syiem u la pynpaw ba kum u MLA ka Ri Bhoi u sngewkmen ba kane ka District ka la kynjoh sha u mawmer ba 31 snem ka jingïaid lynti naduh ba la ïoh la ka jong ka District bad kum u nongmihkhmat paidbah u la pynpaw ruh ba u sngewkmen ba ha ka jingïaid lynti ki la don shibun ki jingkylla wat lada dang don bun ki jingduna hapoh kane ka District.
U la shim ruh ïa ka bynta ban ai khublei kyrpang ïa ki nongïalam ba la lam khmat ha kaba pynïoh ïa ka Ri Bhoi District naduh u Dr. D.D Lapang, u Dr. Fr. Sylvanus Sngi bad kiwei kiwei ki nongïalam nanmar dei lyngba ka jingïalam lynti jongki, ba ngi la ïoh ïa ka District ba pura hapoh Ri Bhoi District.
Shuh shuh, kum u nongïalam u la kyrpad ruh ïa ki paidbah ka Ri Bhoi kin dang don ka mynsiem jong ka jingïatrei lang na ka baroh ki liang bad kumjuh ruh kum ki nongïalam naduh ki riew rangbah, ki samla, ki seng bhalang ba kin shim ïa ka jingkitkhlieh lang na ka bynta ban kyntiew ïa kane ka District bad kyrmen skhem ruh haba don ka jingïatrei lang ngin lah ban kyntiew ïa ki paidbah bad ïa ka District ha baroh ki liang ban ïa kynjoh lem sha kata ka jingkiew shaphrang kumba long lem ha kiwei kiwei ki Disstrict hapoh ka jylla bad ka ri hi baroh kawei, u la bynrap.
