Shillong, Jylliew 02 : Ka Laban Sports Club ka la sdang ban pynïalehkai ïa ka 2nd Meghalaya Open Table Tennis Cash Prize Tournament 2023 ha ka sngi Thohdieng ha Indoor Stadium jong ka club kaba don ha Laban.
Ïa katei ka lympung la sdang da ka jingpynbyrngia lyngba ka nongrwai ba pawnam jong ka Jylla ka samla Kyntiewlin Mawphniang, kaba la ai ka jingrwai da ka sur ba syiang jong ka sha ki paidbah nongwan peitkai.
La sdang ïa ka jingïalang da ki kyntiew pdiang burom na u Bah Panborlang Nongkynrih, uba dei u dkhot ka Executive Committee jong ka Laban Sports Club. U Bah Sammy Myrthong, President jong ka Laban Sports Club, u la pynpaw ka jingsngew nguh bad ai khublei ïa baroh ki nongïashim bynta kiba la pynlong ïa ka Laban Sports Club ba kan ïoh ban buh ïa ka Table Tennis Academy ha ka thaiñ Northeast.
Ha kane ka sngi, ka Kong Rosetta M Kurbah (IAS), kaba dei ka Deputy Commissioner jong ka East Khasi Hills ka la long kum ka kongsan, ha kaba ka la ai jingkren bad ai mynsiem ïa baroh ki nongïashim bynta. Ka la kyntu ïa baroh ki athlete ba kin pynleit jingmut bad ïakhun tyngeh khnang ba kin poi sha ka thong bad ban don ka jingshanñiah ha lade.
“Ngi dei ban pynleit jingmut sha ka thong kaba ngi don bad ba ngim dei ban kynran dien noh. Ka jingtrei shitom bad ka jingkut jingmut ka ïalam sha ka jingjop. Phi dei ruh ban bate ïa ka por pule kot bad na ka bynta ki jingïalehkai,” la ong ka Kong RM Kurbah.
Ha kane ka sngi la ïadonlang ruh u Rangbah Shnong ka Laban u Bah Edward Kharwanlang uba la long kum u Kongsan, Bah David Laitphlang uba dei u Vice-President jong ka Laban Sports Club, Bah Suresh Singh, uba dei u dkhot ba la rangbah jong ka Laban Sports Club, bad kiwei kiwei.
Ha katei ka lympung ki don 72 ngut kiba ïashim bynta ha ki hynñiew tylli ki kyrdan. Ka kyrdan Under-15 Boys’ Singles, Men’s Doubles, Under-19 Boys’ Singles, Veteran Singles (40 years and above), Veteran Doubles (40 years and above), Men’s Singles, bad Women’s Singles.
Ïa ka jingïalehkai phainal yn pynlong ha ka sngi Saitjaiñ (3-6-2023), ha kaba u Bah Sanbor Shullai MLA ka Laban Constituency un ïadonlang kum u kongsan bad ka Kong Isawanda Laloo, IAS, Director jong ka tnad Sports & Youth Affairs kum ka symbud kongsan.
