Jowai, Ïaïong 28: Ka ophis treikam jong ka Krishi Vigyan Kendra (KVK), Jaiñtia Hills ha ryngkat ka jingïatreilang ka Agricultural Technology Management Agency (ATMA), West Jaiñtia Hills ha kane ka 26 tarik u Ïaïong kila pynlong ïa ka ‘Kisan Bhagidari, Prathmikta Hamari Campaign’ shi bynta na ka jingrakhie ïa ka 75 snem ne ka ‘Azadi Ka Amrit Mahotsav’ ha KVK Campus Wahiajier.
Na ka liang u Dr. D. Pasweth, Senior Scientist & Head, KVK Jaiñtia Hills ha ka jingkren lamphrang ula pynsngew halor ki kam kiba ka ophis kala dep ban ai jinghikai sha ki nongrep bad ha ka juh ka por ki la long kiba jop lyngba da ka jingïatreilang jong ka sorkar jylla bad ka sorkar kmie.
U ma S. Syngkon, Agriculture Development Officer (ADO), West Jaiñtia Hills ula ai ki jingtip shaphang ka PM Kisan Schemes bad kumjuh shaphang ka jingdonkam jong ki nongrep ban don ïa ki ID khnang ban ïoh jingmyntoi na ki skim sorkar.
Ha kane ka sngi la sam ruh ïaka khusnam sha u Foster Kharsahnoh uwei na ki nongrep ba paw bha na ka shnong Sohphoh kaba hap hapoh ka Thadlaskeiñ Block, ba la aiti da ka kong L. Lakiang, PD, ATMA West Jaiñtia Hills uba la lah ban pynmih shibun u Tit, kumjuh ka kam ri syiar, ka kam ri sniang bad ka kam rep jhur. Ki Nongrep kila ïoh jinghikai ruh ha kaba ïadei bad ka juk (Science) ba la batai bniah shapang ka rukom rep da u ma H. Papang, bad ka kong B. Kharbamon.
Ha kane ka sngi la pyni bad batai shaphang ka kam rep kam riang da kaba pyndonkam ïa kor ki bor bad ka jingsam ïa ki symbai, ha kane ka sngi ki nongrep ka thaiñ kiba la don haduh 94 ngut kila wan ïashim bynta lang ha katei ka prokram lem bad ki ophisar na ki tnad sorkar.
