Iatai ki MLA thymmai bad ki MP Germany halor ki lad pynïasoh da ki surok bad Digital

Shillong, Jymmang 29 : Hynriew ngut ki MLA ba dang thymmai ka Jylla, ki la ïakynduh ïa ki Nongmihkhmat ka Ri Germany bad ïatai halor ki jingtei ba kongsan jong ki lad pynïasoh (transport infrastructure) bad ka jingpynïasoh da ki kor digital (digital connectivity) haba pynbeit jingmut eh ïa ki mat ba donkam hangne ha Jylla Meghalaya.
Kine ki hynriew ngut ki MLA ki dei u Myntri ba Tnad ïalehkai Bah Shakliar Warjri, Kong Santa Mary Shylla, Bah Damanbait Lamare, Charles Marngar, Ian Botham Sangma bad Bah Gabriel Wahlang.
Ki Nongmihkhmat na ka Ri Germany ki kynthup ïa u MP jong ka CDU/CSU Parliamentary Group Florian Muller bad u Dr Adrian Haack uba dei u Resident Representative sha India jong ka Konrad- Adenauer-Stiffung, New Delhi.
Ha kane ka jingïakynduh, kine ki arliang mamla kila ïakren halor ka mat ‘digital connectivity’ bad ‘transport in India’ bala pynleit jingmut kyrpang sha ka Jylla Meghalaya.
Ka transport infrastructure (jingtei ba kongsan jong ki lad pyniasoh) bad ka digital connectivity (lad pynïasoh da ki kor digital) ki dei ki atiar ba kongsan ha ka jinglah ban treikam bha hapoh kane ka imlang sahlang ba mynta.
Haba ïohi ïa ka jingdonkam ban pynkhlaiñ ïa ki lad pynïasoh bad ka jingtreikam ka kor digital ha Meghalaya, kine ki MLA ki la ïaphylliew jingmut sani bha bad u MP ka Germany, da ka jingthmu ban pynroi ïa kine ki artylli ki kam hapoh ka Jylla.
U Florian Muller, MP ka German, ula kren halor ka jingdonkam markylliang hapdeng ka transport infrastructure bad ka digital connectivity, haba ban jur ba kine ki shaniah kawei ïa kawei ban lah treikam bha.
U Muller ula ban jur ba ka lad pynïasoh lyngba ki kor digital ka long kaba kongsan bha ban pynthikna ïa ka jingïaid beit ïaid ryntih ki kam ba ïadei bad ki jingtei ba kongsan jong ki lad pynïasoh, kynthup ka Transport Management System, Traffic Montoring and Control bad ka jingïakren ïakhana (communication) hapdeng u Nongniah kali bad ki passenger.
Ha kane ka jingïasyllok, ki MLA ka Meghalaya kila pynpaw ïa ka jingsngewkhia halor ka jingduna ki jingtei jong ki lad pynïasoh hapoh ka Jylla. Watla ka Jylla ka la kynjoh 50 snem naduh ba ïoh Jylla lajong, kiba bun ki Shnong ha Meghalaya kim pat ïoh satia ïa ki surok kiba bha.
Ha kajuh ka por, u Bah Shakliar ula ïaroh ïa ka jingnang lah pynjanai bad jingnang bun ki surok hapoh ka Jylla ha kine ki san snem bala leit noh. Ula ban jur ba ka long kaba kongsan ïa ka Sorkar Meghalaya ban ïai bteng ha ka ban kynshew pisa ha kine ki kam khnang ban pynthikna ïa ka jingnang kiew bad nang roi ba khlem sangeh hapoh ka Jylla.