Shillong, Jymmang 29: Da ki hajar ngut ki paidbah jong ka Sohra Constituency kiba dei na ki thaiñ Laitlyngkot bad Nongkynrih ki la ïamih paidbah mynta ka sngi ban pynpaw ka jingkyrshan ïa ka jingpynbha ïa ka Reservation Policy.
Ki nongshongshnong naduh ki khynnah, ki samla, ki longkmie longkpa, ki la mih na ki Shnong 12 mer, elaka Laitlyngkot, Raid Nongkynrih, Umthli bad Nongtymmai ban pynlong da ka jingïaïaid paidbah sha Madan Syllai Sning ha Nongthymmai, Laitlyngkot da kaba ïapyrta ban dawa pynbha ïa ka Reservation Policy bad pynpaw ruh ka jingkyrshan ïa u Bah Ardent.
La pynlong ïa ka jingïalang ha katei ka madan, ha kaba la ïoh ïa ka jingpynshai na ki nongïalam kiba la khot ïa kane ka jingïalang bad kumjuh ruh na ki riew paidbah kiba la pynpaw beit tang kawei ka sur bad kata ka long ban kyntu ïa ka sorkar ba pan pdiang ïa kane ka jingdawa ka Seng Voice of the People Party, namar ka Reservation Policy ka la ktah palat ïa ki samla wad kam wad jam bad kan ktah ruh ïa ka lawei jong ki khun ki kti.
