Khlem dawa ki Seng Riewlum ban bishar biang ïa ka MOU, ong u CM

Shillong, Ïaiong 27 : Khnang baki Seng Riewlum kiba iasynrop lang haka sorkar MDA kin ym ioh lad ban sait khuid halor ka jingpynbeit pud pynngat lang u Myntri Rangbah u Conrad K Sangma ia ki ha kajuh ka jar da kaba ong hynne ka Sngi Balang ba ki seng riew lum ka Jylla ki khlem dawa satia ban shong bishar biang ïa ka Memorandum of Understanding (MoU) bala iasoi hapdeng ka Sorkar Meghalaya bad Assam ban pynbeit noh ïa ki 6 tylli ki jaka ba ïakajia.
Haba ïakren bad ki nongthoh khubor, u Conrad ula ong ba ki Seng Riewlum kiba donlang ha ka Sorkar Meghalaya Democratic Alliance (MDA), ki khlem pat dawa ïa kum kane hynrei ki don ki shimet na kine ki party kiba la pynpaw ban shong bishar biang ïa ka MoU.
“Ki party hi kim pat ai eiei ha nga da ka jingthoh ne ïakren ïa kano kano kaba ngim mynjur ïa ka MoU” ula ong bad bynrap “Nga la ïakren bad baroh ki Nongïalam jong ki party ba iatreilang ha ka Sorkar bad kila pynpaw ïa ka jing sngewkhia hynrei tang halor ka jingpynbeit noh ïa ka kam. Kila iadonlang bad ngi, ngi la iadonbynta lang ha ka rai bad kam don satia kano kano ka jingartatien lait noh tang ki nongïalam shimet” ula ong.
“Ngi long kiba la khreh ban batai ha ki ïa baroh ki sienjam ba ngi la shim bad nga ngeit skhem ba kin sa sngewthuh bad iatyllun lang bad ngi” ula bynrap.
U Myntri Rangbah ula pynkynmaw ruh ba ïa ka MoU la iasoi ha ka jingiadonlang ki arngut ki Myntri na ka United Democratic Party (UDP), uwei na ka Peoples Democratic Front (PDF) bad uwei na ka Hill State Peoples Democratic Party (HSPDP).
“Baroh ki seng riewlum ki don bynta lang ha ki Regional Committee. Namar kata, khlem pep kila ïakren hala ki jong ki party” ula ong haba bynrap ba kim shym la pynpaw satia ïa kano kano ka jingpyrshah ïa ka MoU.
Dang shen, u Nongïalam ka Liang Pyrshah Dr Mukul Sangma ula kynnoh ba ki Seng Riewlum ka Jylla kila kren ïa kane ka kam tang ban pynpaw nam ïalade hynrei kim nud satia ban ieng pyrshah ïa ka MoU bala iasoi bad ka Assam.