Ka Liang Pyrshah ka dei ban kylli, lada ngi thok ïa ki paidbah, balei pat bun kiba wan ïasoh sha ka NPP

Shillong, Ïaiong 27 : U National President ka National People’s Party (NPP), Conrad K Sangma ba dei ruh u Myntri Rangbah ka jylla ha ka sngi Balang u la ong ba wat hadien ba ka Liang Pyrshah ka kynnoh ba ka NPP ka la shukor ïa ki paidbah haba ïadei bad ka ishu pynbeit pud, hynrei katta nang bun pynban ki MDC bad ki nongïalam jong kiwei ki party kiba wan ban ïasoh sha ka party.
“Lada ngi la shukor ïa ki paidbah jong ka jylla, ki paidbah kin ym ieh la ki jong ki party bad wan ban pynïasoh pat sha ka NPP. Ka Liang Pyrshah ka donkam ban buh jingkylli ïalade bad peit ïa la ka lyngkdong kaei kaba ki leh bad kaei kaba ki la dep leh,” ong u Myntri Rangbah haba kren ha ka jingkynduh lang jong ki samla NPP ne National People’s Youth Front (NPYF) ha Soso Tham Auditorium.
Nalorkata, u Conrad u la ong ruh ba ka jingsnohkti lang jong ki samla kadei kaba donkam haduh katta katta ym dei eh tang ha ki seng sainpyrthei hynrei khamtam eh ban shakri ruh na bynta ka imlang sahlang.
Da kaba pynshai ba ka jingïakhun ban pynbeit noh ïa u pud u sam kam dei satia ka kam kaba suk, u Myntri Rangbah u la ong, “Kane baroh ka urlong da ka jingïatrei bad ka jingsyllok lang bad ka kynhun ha ka sorkar ha shwa ban shim ïa ka rai kaba radbah bad ruh ban jam shakhmat ban pynbeit noh ïa u pud u sam.”
Ha kawei pat ka liang u la ong ruh ba ka long ka kam kaba eh bha ia ka sorkar ban phai dien biang sa shisien ban ïakren halor katei kajuh ka ishu bad ka sorkar Assam namar na ka liang ka sorkar jylla ka la dep ban phah ïa ka thup kyrteng jong ki jaka ba don jingïakajia pud.
Na ka liang u Symbud Myntri Rangbah ba dei ruh u National Vice President, Bah Prestone Tynsong u la ong, “Teng teng sngew duh mynsiem bha lada peit na ki jingkynthoh ha ki youtube. Hynrei mynta ka sngi pat ngi ïohi ïa ka bor jong ka NPP bad ngi ïohi ruh ïa ka jingkhlaiñ jong ki samla jongngi ha ka jylla Meghalaya. Phi la ai mynsiem shisha ïangi. Kin dang don bun ki ishu kiban ngin shim nangne shakhmat bad ngin leh beit ïa ki kam pher la ki briew ki kren kumno kumno ruh.”
U ong ruh ba ym pat don satia ki sorkar kiba nud ban trei kum kane ka sorkar khamtam ïa kiba bun ki ishu kiba ki paidbah ki tip khambha.
Shuh shuh u kyntu ruh ïa ki samla ba kin kynthoh teng teng ïa kaba bha ha Social Media. “Phi lah ban ong tang shi laiñ ruh, tang kata ka la biang palat,” u la bynrap biang.
Ha kane ka sngi la ïoh ruh ïa ka jingkren na u State President ka NPP, Dr. WR Kharlukhi ba dei ruh u MP Lok Sabha, nangta na u National General Secretary, James K Sangma Myntri ka tnad ka Koit ka Khiah, Bah Kitborlang Nongrem, State President NPYF ha ryngkat ka jingdonlang jan baroh ki MLA bad MDC jong ka NPP.
Ha kane ka sngi da ki spah ngut ki nongïalam jong ka National People’s Youth Front ki la wan na kylleng ki bynta jong ka jylla ban shim bynta ha katei ka jingkynduh lang.