Kumba kyndang ïa ki Nongrep na NST, kyndang ïa ki Harijan na Them Metor

Shillong, Ïaiong 27: Ka Federation of Khasi Jaiñtia & Garo People (FKJGP) kala maham tyngeh ïa ka Sorkar Jylla ba kam dei ban mynjur ïa ki jingdawa ka Harijan Panchayat Committee (HPC) haba ong “Kumba phi kyndang ïa ki Nongrep bapli na New Shillong Township, phi dei ruh ban kyndang ïa ki Harijan na Them Metor”.
“Ka FKJGP ka pyrshah jur ïa ki jingdawa ka Harijan Panchayat Committee (HPC) bad kam pdiang satia lada ka Sorkar Jylla ka mynjur ïa kine ki jingdawa. Ka jingïakhih kaba jur kan ap ha Jylla lada bakla shim rai ka Sorkar” ong u Bah Wellbirth Rani, President ka FKJGP haba ïakren bad ki nongthoh khubor.
Kane ka jingmaham kala mih hadien ba ka HPC ha ka jingïalang ba dang shen bad ka Sorkar Jylla, kala dawa ïa ka Sorkar Jylla ba kan ai ei ïa ka jaka ba 10 acrea ha European Ward na ka bynta ban pynsah ïa ki 342 tylli ki Longïing ki ban ïoh mar 200 square meter kum ka jingïabujli ïa ka jaka ha Them Metor, Them Iew Mawlong.
“Baroh ngi iatip ba kiba bun ki briew ba sah ha Them Metor ki dei kiba sah be-aiñ. Ki Harijan kim dei satia ki trai jaka hynrei kila shu kam trai tang namar ba kila sah la slem bah ha kane ka jaka” ula ong haba bynrap “Ki nongsah be-aiñ hi ki dei hi ki nongleh be-aiñ bad ym don aiñ ba ong ba dei ban siew bai lutksan ïa ki”.
Une u Nongïalam ka FKJGP ula pynkynmaw ïa ka Sorkar ïa ka aiñ The Meghalaya Public Premises (Eviction of Unauthorised Occupants) Act, 1980 bad ong ba ka Sorkar ka dei ban pyntreikam thikna ïa kane ka aiñ pyrshah ïa ki Harijan ba sah be-aiñ ym ban ïapeiñ bad ki jingdawa jong ki.
“Ngi kynmaw kyndiang ïa ka jingshah kyndang ki phew tylli ki Longïing trai muluk ba sah bad ba rep ha ki jaka ka Meghalaya Urban Development Authority (MUDA) ba don haka thaiñ New Shillong Township ha u snem 2014-2015. Ngim ïohi ba ka don ka jingiarap na ka Sorkar Jylla ha ka ban pynthied jaka ne shna ïing ïa kine ki Longïing trai muluk hynrei la shu bret ïa ki sha surok khlem ïing khlem jaka” ula ong.
“Lada ïa ki trai muluk phi thom da ka bor bad lehbeiñ, ka shonghok mo ban iarap ïa ki Harijan kiba dei tang ki poi wir bad kiba shong be-aiñ ha Them Metor” ula bynrap haba maham ba ka Sorkar kam dei ban leh shiliang khmat lem kumta ki jingjia kiba sngewsih kin sa jia lada bakla.
Halor ka jingdawa ïa ka jaka ba 10 acrea ha European Ward, une u Nongïalam ka FKJGP ula ong “Kumno ka HPC ka nud khlem ka raiñ ka rem ban buh ïa kane ka jingdawa.Kumno ka nud ban dawa wat ban bei tyngka ïa kine ki Longïing ba kin shna ïala ki ïing ki sem ha ka jaka ba mar 2000sqft”.
U Bah Wellbirth ula ong ba ki dang don byllai ki trai muluk kiba khlem ïing khlem sem, ki bym don jaka puta ne kiba shu shongwai.. balei ba ka Sorkar kam pyrkhat shuwa ïa kine?.
Halor ka jingwan tuklar ki kynhun nabar ka Jylla, une u Nongïalam ka FKJGP ula ong ba lada kine ki kynhun ki sngewkhia shisha ïa ki Harijan ha Them Metor, ki dei ban ïalam noh ïa ki shala ki jong ki jaka bad ban ai jaka, pynshna ïing kumba ki dawa na ka Sorkar Meghalaya.
Une u Nongïalam ka FKJGP ula ong ba ka seng FKJGP kan nym shu sngap jar ïa kane ka kam bad da lei lei ruh kan nym aili ïa ka Sorkar Jylla ba kan shu rai hala ka mon ïa kane ka kam.