Hapoh Hotel Polo Towers shah mait u nong khawai jamiet ïa ki paralok lait salit na ka iap

Shillong, Iaiong 27 : Ha kawei ka jingjia kaba sngew triem bad kaba ym poi pyrkhat ruh ba kan jia tangba ka la jia pat ha kawei ka Hotel ba pawnam ha kane ka nongbah ha Polo Towers ha kaba uwei u nongkhaïi uba dang samla uba khot ban ai jamiet ïa kiba haïing bad paralok ha katei ka hotel u la shah mait pynban da ka wait na khlieh najan shyllag mat kat haduh ba un da mynsaw jur bad lait im da ka said.
Kat kum ka khubor ba la ïoh la ïathuh ha ka miet 11 tarik Iaiong 2022,uwei u samla uba dei u nongkhaïi ha kane ka nongbah u bym kwah ban pynpaw kyrteng ïa lade u la shah mait na ki bynta ka khlieh najan shyllang ha ki riew runar kiba wan rung jubor ha katei ka Hotel Polo Towers hynrei wat la kane ka jingjia ka la jia naduh katei ka miet une u samla haduh mynta um pat koit bad u dang hap ban leit phah sumar beit ha ki doktor. La kynnoh ba ïa kitei ki riew runar la khot da uwei u nongtrei na katei hi ka Hotel ban shoh ïa utei u samla nongkhaïi tang namar ba u ujor ba ka suki palat ka jingpynkhreh bam bad jingbym pynbiang ïa kiei kiba la phah ban pynbiang.
Ha katei ka miet une u samla nongkhaïi u la khot sngewbha ïa ki katto katne kiba haïing bad ki paralok ban ïabam ja miet lang ha katei ka Hotel Polo Towers bad ha kaba sdang baroh baroh ki la ïa kmen bad sngewtynnad ban ïa kynduh lang kumtei. Hynrei ka kut pat da ka jingsngewsih.
Ka jingjia ka la sdang hadien ba la sdang ban ïa bam ja miet. Hynrei ka jingpynkhreh bad jingwan rah ïa ka bam ka suki palat ha kaba ki nongïabam ja ki hap beit ban ïa ap ïa u atta ( Naan bad tandoori roti). kumta utei u nongkhawai jamiet ïa kiba haïing bad paralok ula kyrpad ïa ki nongtrei ba kin kham pynsted hynrei kim patiaw satia hadien kane u la kiew jingbitar bad sdang ban hylla ïa uwei na ki nongtrei (waiter) da kaba bud ïa u bad kylli ruh shano u manager u don. Utei u nongtrei ha ka jaka ba un kren da ka akor ula kynhied bad hylla kylla ïa utei u nongkhot sngew bha ïa ki paralok sha katei ka Hotel. Nalor kata utei u waiter ula byrngem kylla ruh ïa u lada um sngap jar da kaba u kob ban wan ïalam da ki paralok.
Hadien ba ki arngut ki nongtrei kiba la rim bha ki la ïoh sngew ki la mih bad la ïa pynbeit ïa kane ka huri hura bad ïaid beit kata ka bamja miet ha kaba baroh ki la ïabam da ka jingsngew tynnad. Hynrei utei u waiter uba la sat sia u la phah wan ïa ki paralok runar jongu sha katei ka Hotel ban shoh ïa utei u nongkhawai bam.
Haba ki paralok bad kiba haïing ki la ïadep bam bad khreh ban mih noh na katei ka Hotel Polo Towers ka la don ka jingïahylla biang habar ka Hall jongka Hotel bad la ïathuh ruh ba ha kum katei ka por ki la don ruh ki briew kiba ap shabar jongka hotel kiba kwah ïa kynduh ia utei u nongkhawai bamja miet da kaba kynnoh ïa u lai phew jait lai phew skher.
Kumta arngut ki samla kynthei khasi kiba don ha ka Reception ki la phah ïa u ban mih shabar bad pan map khnang ban ym jia ei ei bad u ruh ula kohnguh bad mih beit ban ïakren sngewthuh bad ki.Hynrei ha ka jaka ban ïakren ki la khynniat pynban ïa u ban rung shapoh. Kumta katba ki dang ïakren ban pyntip ïa kane sha ki bor pulit, kynsan kynsan kumba 15 haduh 18ngut ki khynnah shynrang ki la rung jubor hapoh ka Hotel bad hylla beit da kaba kdew kti ba udei utei udei utei.
“Hadien kata ki la shoh ïa ngi kiba don hangta hapoh Hotel bad uwei ula sei da ka wait bad mait beit ïa nga na khlieh bad kti bad da ka jingkyndit nga la kyllon. Nga la pyrshang ban ïakhun bad u bad haba ka wait ka la hap na kti jongu u la phet krad. Hadien katei ka jingjia ki pulit ki la wan poi bad ïa nga la ïalam da ki paralok sha Woodland Hospital ban ïoh jingsumar kyrkieh ha kaba la hap ban suh haduh 24 ksai ïa ka khlieh jong nga bad kumjuh ruh ïa baroh ar ki kti bad dang law katto katne ki ksai dang hynnin ka sngi” ong une u samla ba shah mait.
Une u samla u khlem ujor FIR namar ki pulit ki la wan hi da lade ha katei ka jaka bad ki la rejister case hi ma ki ha kaba uwei u ophisar jongka Sadar Police Station u shimti ban tohkit halor kane ka jingjia. “ Nga sngewsih ba kat ka Hotel Polo Towers kaba pawnam ha kane ka nongbah ka dang long kumtei nalor ba ka don la ki jong ki nongpahara ruh. Ngam tip shuh mano ban nud leit bam ne leit sah ha kum katei ka hotel kaba ym don jingsngaiñ shuh. Mut dur ma phi kumno ki riew runar kin ïoh ban rung shapoh hotel. Hato ban da dei ba la jia ka jingjia ba sngewsih ha katei ka sngi kaei ka khubor ka ban saphriang sha kiwei ki jaka hato kan ym ktah wat ïa ka kam jngoh kai ruh?” ong biang une u samla.
“Khlem pep kan ktah wat ïa kiwei k i hotel ruh haba kum kine ki jingjia ki jia ha ki hotel baheh bad paw. Wat la katta ruh nga kmen pat namar ïa nga ruh la kha la pynheh pynsan pynrangbah hangne kane ka dei ka nongbah jong nga hi, bad nga kmen haba ki paralok bad ki briew ki pyntip ba kin wan sha kane ka nongbah tangba kane kan long ka nuksa ïakito kiba don bynta ha ka ban kyntiew ïa ka kam jngohkai bad peit ba kiba wan kai sha ka jylla kin don ka jingshngaiñ” kyntu une u samla.
Halor kane ka jingjia ki pulit ruh ki la shim khia jur ban tohkit bad ki la kem ruh ïa arngut ki briew kiba donkti bad mynta ki dang don ha byndi ki pulit ban tohkit bniah shuh shuh ïa ki.
“ Ngi dang bud dien ïa ka jingjia khnang ban ïoh kem ïa kiwei kiba ïadon kti lang namar ba ka jingtohkit ka dang ïaid kumta kam long ban ïathuh lut nadong shadong bad hadien ba la dep lut nadong shadong ki bor pulit na ka Head Quarter kin sa ai ka jingtip bniah, ong uwei u heh pulit. Ki pulit ki la ïathuh ba kine ki dei tang ki briew kiba kwah ban thaw jingkulmar bad ki pynpaw ba kin leh tyngeh khnang ba kum kine ki jingjia kin ym jia shuh hadien habud khamtam ha ki Hotel ba sah ki nongwan jngohkai na kylleng ka ri bad pyrthei ruh. Kumta kin thwet jur ban ïoh kem lut ïa kiba donkti bad pynngat ïa hi haki kyndon aiñ.
Haba ïakren bad u trai ka Polo Towers u Kishan Tibrewala u ba don sha bar ka nongbah ha katei ka sngi ba jia bad wan phai kyrkieh ban pynbeit ïa kane ka jingkulmar, u la pynpaw ka jingsngewsih jur halor ka jingjia kaba um shym la poi pyrkhat ba kan jia. U la pan map halor ka jingjia da kaba ong “ Nga sngewsih ba kum kane ka jingjia kan jia hapoh ka Hotel namar kam pat ju jia mynno mynno ruh bad ngan shim khia bad bud dien ba kiba donkti ruh kin ngat ha ka aiñ bad wat ïa kito kiba trei hapoh ka Hotel kiba ïadon kti ruh ym don jaka shuh ïa ki. Ngi la ïakren sngewthuh bad utei uba ngat ha kane ka apot bad mynta ngi ap sa tang ka kaiphod na ki pulit. Haba lakylli hato un beh kam noh ïa kiba donkti u Kishan ula ong “Mynta ki dang don hakti ki pulit bad na ka liang jong ngi ngin sa leh ïa kaba donkam”.