Shillong, Jymmang, 28: Ka Student Leadership Forum ba shi sngi ba la pynlong da ka LTS Shillong Region, ha St. Edmunds Higher Secondary School, Shillong, ha ka sngi U Blei ka la sakhi ïa ka jingïashim bynta kumba 300 ngut ki khynnah skul na ki 7 tylli ki skul kiba don hapoh ka jylli jong ka sor Shillong.
Ka Deputy Commissioner jong ka East Khasi Hills District ka Kong Rosetta Mary Kurbah ka la long ka kongsan, katba u Principal jong ka St. Edmunds Higher Secondary School u Br. Solomon Morris u la long kum u symbud kongsan ryngkat ka jingsakhi lang jong ka Principal ka Loretto Convent School ka Sr. Mable, u Director Youth Ministry jong ka Sacred Heart Theological College u Fr. Alayee bad kiwei kiwei.
Haba kren kum ka kongsan ha ka jingplie ïa kane ka lympung, ka Kong Kurbah ka la kyntu ïa ki khynnah skul ba kim dei ban lehraiñ ban ïakren bad ki parabriew bad ka la bynrap ruh ba ka jingshah skhor jong ngi ïa ki jingkren ki bym ai jingmyntoi ka shong ha ka jingsngew jong ngi shimet. Ka la ai jingmut ïa ki khynnah ba ki dei ban pdiang ïa ki parabriew namarba ha kane ka pyrthei ka donkam ruh ïa ka jingïadei.
Ha kane ka sngi, la pynïaid ïa ka lympung da Br. John P Tom, Tom CMI uba long u Coordinator jong ka LTS Shillong Region.
Ka Dr. Judita Syiemleih na ka Rotary International ka la ai jingkren halor ka phang “Leadership for Adolescents”, u National Vice President jong ka JCI India u JC Ankur Jhunjhunwala u la kren halor ki kyrdan bapher bapher jong ka jinglong nongïalam bad kumno ban long ki nongïalam.
Hadien ka jingïabamja sngi, ka Kong Eva Thabah ka la pynshai sha ki khynnah skul kumno ban don ha lade ïa ka jinglong nongïalam.
Shwa ban pynkut ïa ka jingïathir nia, u Sub Divisional Officer jong ka Sadar Shillong u Swapnil Pawar u la ai jingkren halor ka Cyber Security ha kaba ki khynnah skul ki la ïoh jingtip ïa ki jingmyntoi bad ki jingma kiba ap ha ka jingïaid lynti lada pyndonkam bakla ïa ka social media.
Ka LTS ïa mynta ka don ïa ki unit ha ki 15 tylli ki skul ka nongbah Shillong bad ka tien phira ka long “For God and the World”.
