Balei ba ki Khasi Pnar ha Block – 1 kim hun ban sah ha Assam bad kwah ban don sha Meghalaya

Dang bun ki paralok kim sngewthuh bha ïakane ka phang bad don kiba ong lada sah sha Meghalaya ne sha Assam ruh kam lei lei, tangba ka jinglong trai shnong jong ngi hakato ka jaka ka long kaba donkam.
Hooid, shisien pyrkhat te ka dei tangba haka jingim briew hi kam long tang ban shu im bad shu shong shu sah hangto kum ki dieng ki maw, ngi donkam ka ktien ka thylliej ka thoh ka pule, ka ñiam ka rukom ka riti ka dustur ka kheiñ kur kheiñ jait, ki kot ki sla ki dulir bad ki jingthoh jingtar ka synshar khadar bad kumta ter ter. Kumta, lada ngi im bad sah sha ki jaka kiba ki bym ïadei ka synshar khadar, ka riti ka dustur, ka riam ka beit, ka ktien ka thylliej ka thoh ka pule ka rukom im bad ka pyrkhat pyrdaiñ te ka long kaba shem jynjar bad shem jingeh shisha. Nangne keiñ kin mih ki jingsngewpher ñiam sngewpher jait bynriew sngewpher riti dustur bad sa mih ki jingshah lehbeiñ jingshah banbeiñ bunjait bun rukom.
Mynta to ngin ïapeit ïakine ki jingshisha balei ba ngi ki Khasi Pnar ba shong basah ha Labang Nangphyllut Pangam Raliang (Block -1) ngi kwah ban don sha Meghalaya;
1. Namar ba mangi ki dei ki Khasi Pnar.
Ïaka Elaka Labang Nangphyllut la pynlong daki lai tylli ki Raid, ka Raid Nongjrong Raid Labang bad ka Raid Nangphyllut katba ki Pangam Raliang pat ki hap hapoh ka Elaka Raliang kaba dang don la u jong u Daloi haduh mynta.
Ngi lah ban pynshisha ba ngi dei ki Khasi Pnar naka rukom kheiñ kur kheiñ jait namar ba mangi ngi ai jait shaka kynthei. Naka ktien ka thylliej, namar ngi kren bad thoh daka ktien Pnar ïaka um ngi ong ka um, ïaka ding ngi ong ka ding, ïaka lyer ngi ong ka lyer, ïaka sngi u bnai ngi ong ka sngi u bnai ïaka ja ja ngi ong ka ja, ïaka bam ngi ong ka bam ïaka mynsiem ngi ong ka mynsiem bad ïaka jingim ngi ong ka jingim. Ka juh ka riti ka dustur ka riam ka beit ka rukom rep rukom riang ka rukom bam rukom dih bad kumta ter ter.
2. Namarba kadei ka ri bad ka khyndew ka shyiap jong ngi.
Ngi lah ban ong baka dei ka ri bad ka khyndew ka shyiap jong ngi namarba dei mangi kiba shong basah shwa.
Hashwa baki nongwei (Mikirs now Karbi) kin wan shong wansah hakane ka ri jong ngi, mangi ki Khasi Pnar ngi ngi la shong lasah lypa daki spah spah snem mynshwa. Ïakane, ngi lah ban pynshisha haki bun rukom ki sakhi sabud. Kaba nyngkong ka dei naka jingjer ïaki kyrteng lum kyrteng wah kyrteng shnong kyrteng thaw. Ki lum kum u Lumdorbin Lumlama Lumjrong Chahlyer Pampyrthad Sarynthu bad kiwei kiwei.
Ki wah kum ka wah Mynriang Myn-i Umlong Umnam Umryntih Umteli Umbinong Umshara Umbaso Umpu bad ki wei kiwei. Ki shnong ki thaw, wat ki shnong ki thaw kiba shong basah daki wei pat ki jaitbynriew kum ki Karbi bad Nepali ruh lajer kyrteng daka ktien Pnar suda kum ka shnong Myn-i Lakaroi Tahpat Mooiong Khloolaphiang Umbaso Umpu Umshara Umkhyrmi Mookoilum Moothade bad kiwei kiwei de. Haba la ïoh ban jer kyrteng daka ktien Pnar kamut badei mangi ki Khasi Pnar kiba shong basah shwa lane ki trai ri trai muluk. Wat ka ktien ka thylliej ruh bun baki Karbi ki shim kylliang naka ktien Khasi Pnar jong ngi kum ka nuksa, “Nim rokom” ki shim naka Ktien pnar Niam rukom “Pinchong pinthi” naka ktien pynchong pynthiah “Sintu” Syntu haka ktien Pnar “pinrem” pynrem bad kiwei kiwei de.
Wat ka shad ñiam ba kongsan tam jong ki kaba ki khot ka, “Chomangkan” ruh ki ïoh pateng nangi ki Pnar. “Chomang” kamut Pnar bad “Kan” kamut shad. Kumta “Chomangkan” kamut ka Shadpnar.
3. Naduh hyndai hynthai kulong kumah kadei ka Hima Jaiñtia.
Naduh bympat ïoh jingkheiñ, kat haduh bala shem ïaka Hima Jaiñtia haka snem 1500 A.D ka Elaka Labang Nangphyllut ka hap hapoh ka Hima Jaiñtia. Ngi lah ban pynshisha daki Doloi ki pator ki sangot ki maji bad kumta ter ter. Hapoh ka jingsynshar ka sorkar Phareng naduh ka snem 1835 haduh ka snem 1947 kane ka Elaka ka hap hapoh ka Jowai Civil Sub-Division. Ka sorkar Phareng ka pynhap baroh ki jingsynshar khadar jong ka hapoh Jowai Civil Sub-Division.
Pynban haba ka ri India ka ïoh ïalaka ka jinglaitlud haka snem 1947 bad haba la long Ri Synshar Paidbah haka 26 tarik January 1950 bad hapoh ka Riti Synshar jong ka ri India haka khyrnit kaba phra jong ka Sixth Schedule la thaw ïaki District Councils haki bynta Rilum jong ka jylla Assam. Te ka Boundary Commission kine ki District Councils ki la pynhap jubor noh ïangi shapoh u pud u sam jong ka United Cachar & Mikirs Hills (Karbi Anglong mynta) haka jaka ban neh bansah haka United Khasi & Jaiñtia Hills District. (Jaiñtia Hills Autonomous District Council mynta) ïakane, kane ka commission ka leh khlem ka jingtip bad jingmynjur jong ki briew jong ngi. bad haba ngi la ïoh ïalaka jong ka jylla ruh ki nongïaleh Hills States jong ngi kim pat lah ban pynbeit ïa u pud u sam.
4. Kat kum bala kubur daka sorkar Assam.
Haba la pynhap jubor ïangi sha Mikirs Hills Assam kumba nga la ong haneng, ki riew rangbah jong ngi ki ïeng ban ïaleh pyrshah ïakane ka buit bymman bad ka jingleh donbor jong ka Assam te hakaba khatduh ka sorkar Assam kam banse ban kubur ïakane ka jingleh bakla jong ka. Te ka la pynmih hukum ïaki artylli ki District Councils kata ka Uinited Cachar Mikirs Hills bad ka United Khasi Jaiñtia Hills bad sorbe lang bad ban ai ïaki Data kiba biang ïaki bynta kiba dei ban re-transfer biang sha United Khasi Jaiñtia Hills. (Meghalaya mynta) Kane ka hukum ka mih haka 11th May, 1957 bad kine ki artylli ki District Councils kila pyndep lang ïakane ka joint survey haka 17 – 23 , Feb. 1958 bad kila ai ïaki report, ki kyrteng shnong ki jaka puta ki Map kiba dei ban re-transfer noh sha Meghalaya.
Kane ka kam ka sahteng tang naka daw jong ka jingpyn-eh jong ka United Cachar & Mikirs Hills bad ka sorkar Assam bad ka jingpyndem tdong jong ka jylla Meghalaya jong ngi.
Kumta, hakane ka jingthmu jong ka jylla Assam bad Meghalaya ban pynbeit ïa u pud u sam hapdeng kine ki ar jylla ngi dawa jur iaka sorkar Assam Meghalaya ba ki dei ban pyndep noh ïakane ka kam re-transfer ïaka Block-1 jong ngi. Lymda ki lah ban pynwan biang ïangi sha Meghalaya te dalei lei ruh u Conrad um dei ban soi ïaka MOU pynbeit pud.