Hakhmat ki heh ka World Bank pynsngew u CM ïa ka thong ban pynlong ïa ka Meghalaya ka $10 billion Economy

By Mawphor Editor On May 28, 2023

Shillong, Jymmang 27: U Myntri Rangbah ka Jylla u Conrad Kongkal Sangma ha ka sngi Thohdieng u la wanrah ïa ka jingbuh thong jong ka Jylla ban kynjoh ïa ka ïoh ka kot kaba $10 billion sha ka World Bank Panel ha Meghalaya House, New Delhi.
Ki nongwan ïashim bynta ba pawkhmat na ka World Bank ki long u Director ha Ri India Augustus Tano Kouame, Lead Social Coordinator, Meghalaya Junko Onishi, Senior Economist Benedicte bad Senior Economist Mohan Gopalakrishnan.
Na ka liang jong ka Meghalaya ki long u Myntri Rangbah ka Jylla ba la synran da u Chief Secretary ka Jylla u Bah Donald P Wahlang, u Development Commissioner u Sampath Kumar bad u Commissioner and Secretary u Dr. Vijay Kumar D.
“Ngi don ha ka jingïakren ba seisoh bha bad u Auguste Tanu Kouame, u Director ka Workd Bank ha India bad ka kynhun jong u, halor ka lynti ba shakhmat ban kham pynjanai ïa ka synshar khaddar bad ki project ba ai ïa ki jingshakri ba hun ha Meghalaya. Kum ka Sorkar, ngi la kut jingmut ban pynthikna ba ka jingshakri ka Sorkar bad ka jingpyntreikam ïa ki project kan long kaba janai bha,” ong u Myntri Rangbah ka Jylla haba kren ha ka jingïalang.
“Ngi la takhuh ïa shibun ki jingtynjuh ha ka jingpyntreikam ïa ki project, hynrei, lyngba ka jingtrei shitom ba khlem shongthait, ngi la lah ban ïoh kheit ïa u soh ka jingjop da ka jingïarap jong ki project ba bei pisa na shabar. Ka World Bank ka dei ka paralok ba la synñiang bha sha ka roi ka par ka Meghalaya bad kaba ïai bteng ban ai ka jingkyrshan,” la ong u Sangma.
Ka World Bank mynta ka la bei tyngka ïa ki project ba kot palat ïa ka T. 2400 klur hapoh ka Jylla bad ïa ka jingïaid ki kam ki jam jong kine ki projek la ai jingkheiñ sha ka kynhun ka World Bank da ki Ophisar ka Jylla.
Ki nongmihkhmat jong ka World Bank ki la pynpaw ïa ka jingkmen ban ïohi ïa ka jingjop jong ki projek bad ki la ïaroh ïa ka Meghalaya halor ka jinglah ban pyntreikam bha.
Ka World Bank ka la kular ruh ban ïai bteng na ka bynta ban ai jiingkyrshan bad ban nang ai ïa ki projek ha ki snem ban wan. Kine ki projek ki long kiba kongsan ban pynurlong ïa ka jingphohsniew jong ka Sorkar MDA ba ka Meghalaya kan kynjoh ïa ka thong ban long ka Jylla kaba ka ïoh ka kot ka kynjoh ïa ka $10 billion.