Jowai, Ïaïong 25: Ka seng ki nongdie dohmasi jong ka West Jaiñtia Hills District, haka jingïalang kaba long ha madan jong ka ïewdie masi kaba don hajan jong ka jingkieng Pamblah, haruh jong u surok bah Jowai-Shillong, ki la rai ban pynlong biang ïa kane ka ïew kaba la rim kumba juh long ha ki por ba mynshwa.
La ïathuh da u President ka seng u ma L. Dkhar ba katei ka ïew die masi bad ot doh ka la treikam la kumba ar taiew ei ei, u la ong ba kane ka ïew ka dei kaba ju long tang shi sien shitaïew kata tang ha ka sngi Musiang ne ka sngi longïew jong ka Iawmusiang Jowai.
Shuh shuh ula ong kumba long mynta kane ka ïew ka la sdang ban treikam biang bad u buh ka jingkyntu ïa baroh ki nongdie bad nongthied ba kane ka ïew kan treikam biang kum ba juh long, ula pyntip ba kane ka ïew ka la sangeh shipor naduh u snem 2020 ter ter haduh mynta, na ka daw jong ka jingwan lyngshop jong ka khlam Covid-19.
Katba u Secretary ka seng u ma Yoolang Ryngkhlem, u la ong kumba long mynta la ïohi ïa ki nongdie bad nongthied ki la sdang ban wan sha kane ka iew, kumta u kyntu ia kiwei de ba kin wan sha kane ka iew die masi ot don kumba ju long haki por mynshwa.
