Pynïeng biang ki 10 Kur ka Rikhaiñ Nonglynkien ïa ka sokular ba naduh u snem 1949

Mawkyrwat, Ïaïong 25: Ki 10 Kur kiba hap hapoh jong ka Rikhaiñ Nonglynkien ha ka jingïakynduh lang jong ka jingïalang ba pynlong ha kine ki khyndiat sngi ki la shim ïa ka rai ban pynim biang ïa ka jingïateh kular jong ki 10 Kur kaba la long naduh u snem 1949.
Napdeng kine ki Shiphew Kur ki kynthup ïa ki Ar Kur kata ka Kur Sangriang bad ka Kur Lyngdoh Umïong bad ki 8 kur pat ki kynthup ïa ka kur Mawlein, Shangpliang, Pariongbah, Nonglang, Kharjahrin, Lyngkhoi, Myrthong bad Pariongnah.
Da ka jingïamynjur lang kine ki Shiphew Kur ki la rai ban bud ïa ki kyndon jingïateh kular kaba naduh u snem 1949 ryngkat ka jingpynkylla kaba malu mala katkum ka juk kaba mynta. La shim ruh ïa ka rai ban jied ïa ki nongkitkam jong ka Rikhaiñ Nonglynkien ha kaba la jied Chairman ïa u bah Dominic Shangpliang bad Secretary ïa u bah Kwosterly Sangriang, nalor bun kiwei pat ki nongkitkam lem bad ki ki dkhot jong ka Executive Committee.
Ha kane ka sngi la pule ruh ïa kot jingithuh lane pynskhem na u Syiem ka Hima Maharam (NOC). Ha kane ka sngi la ïoh ba pynskhem ruh ïa ki nongkitmam jong ka komiti da ka jingmynjur lang jong ka Dorbar jong ki Shiphew kur bad la shim ruh ïa ka rai ban shanniah ha ka komiti na ka bynta ka bha ka miat bad ban pyntyllun ïa ki kam jong ka Rikhaiñ Nonglynkien.
Na ka liang jong ki paidbah Shiphew Kur ki la pynpaw ïa ka jingsngewkmen halor ka jinglah jong ki Rangbah ban lum biang bad ban tehsong kumba la ïalam bad btien lynti da ki nongïalam ba mynshuwa jong ki Shiphew Kur.
Kane ka long katkum ka kyrwoh khubor na u bah Commander Shangpliang, Publicity Secretary jong ka Shiphew (10) Kur Rikhaiñ Nonglynkien.