Shillong, Ïaiong 24: U Lat ka Jylla Satya Pal Malik ula pynpaw ïa ka jingihun ïa ka jingtreikam ka Sorkar MDA ha kine ki saw snem bala leh noh bad iaroh ïa ka jinglong nongïalam u Conrad Kongkal Sangma kum u Myntri Rangbah ka Jylla ban pynbeit ïa kiba bun ki ishu kiba ktah ïa ka Jylla.
“Ka jingstad jong u briew hi ka dei ba kumno ba u lah ban weng ïa ki jingeh. Um ju pynkha ïa ki jingeh. Ki briew ki lah ban ïakynduh ïa u. Uba sngap bad leh ïa kaba donkam. namar kata, nga da ihun shisha ïa ka jingtreikam jong u Myntri Rangbah ka Jylla” ong u Malik haba ïakren bad ki nongthoh khubor dang shen.
Halor ka kam pynbeit khappud, u Lat ka Jylla ula pynpaw ïa ka jingsngew skhem ba ka Jylla Meghalaya bad Assam kin lah ban pynbeit noh ïa ki jingïakajia baroh da ka jingiasngewthuh jingmut.
Ula shem ruh ba ki arngut ki Myntri Rangbah-Conrad Kongkal Sangma bad Himanta Biswa Sarma ki dei kiba ïa hap jingmut bha bad kiba iatreilang ha kaban pynbeit ïa kino kino ki ishu.
“Ka dei shisha ka kam kaba bha ba ki artylli ki Jylla ki pynbeit noh ïa ki jingïakajia. Nga kyrmen ba ki ar jylla kin sa lah pynbeit lut noh ïa baroh ki jingïakajia pud” ong u Malik.
Ha ak 29 tarik Lber, ka Jylla Meghalaya bad Assam kila iasoi ïa ka soskular Memorandum of Understanding ban pynbeit noh ïa ki 6 tylli ki jaka ba ïakajia napdeng ki 12 tylli. Ïa kane ka soskular la iasoi ha ka jingiadonlang u Myntri kam Pohïing ka Ri u Amit Shah, uba la ong ba kane kan dei ka sngi ka ban sah khana pateng la pateng.
Ka bynta ba ar jong ka jingïakren pud ban ïapynbeit ïa ka jingïakajia sa ha ki 6 tylli ki jaka ba dang sah, kan sa long ha u bnai Jylliew-Naitung.
