Mih ïew ki khun ka Seiñ Raij Jowai ban lehkmen ïa ka ‘Shad Sukra 2022’

Jowai, Ïaïong 24: Ki khun ka Seiñ Raij Jowai mynta ka sngi ki la mih madan ban pynlong ïa jinglehkmen ‘Shad Sukra’ ba shisien shisnem, hashwa ba ki khun ki hajar kin hiar leit rep sha ki hali ki pynthor ban bet ïa u symbai u kba da ka jingkyrmen ban ïoh kheit ïa u kba ba sei soh.
Ka phang jong kane ka Shad Sukra mynta u snem ka ong “Samoi wa kylla wa pynchoh ïei por, ïeiwa da ïoh u tip u ñiawkor” bad ïa kane ka Shad Sukra la pynïaid da ka Arts & Culture Committee jong ka Seiñ Raij Jowai.
La sdang ïa kane ka Shad Sukra naduh hynnin ka sngi ha la ki jong ki jong ki dong ki shnat da kaba pynlong ïa ki jinglehkai drama bad mynta ka sngi kaba dei ka sngi mih ïew, ki khun ka Raij Jowai naduh ki longkmie ki longkpa, ki khun samla bad ki hep kiba rit ki la mih ryngkat ki riam ki biet ba itynnad bad ba iphuh iphieng.
La ïathuh ba kane ka Shad Sukra ka long kum ka por ban ai bam ai dih, ka por kaba bsa ba pjah ïa u khun bynriew lyngba ka jingdon jingem ha ka mei mariang kaba pyndap pynbiang ha baroh ki saw aiom, la ong ruh lyngba kane ka shad sukra kan wanrah ruh ïa ka jingïaieit, ka jingïatylli para nongshong shnong. Kane ka Shah Sukra ka long ruh shi bynta na ka lad ban sei ïa ki sap ki phong naduh ka rwai ka siaw bad ka shad ka kmen, la pynsngew ruh ba ka Shad Sukra ka dei ka lad ban pynpaw pyrthei ïa ka jingphuh jingphieng bad jingriewspah jong ka Riti ka Dustur ki khun u Hynñiewtrep Hynñiewskum.
Ha Madan Mynkoi Loompydi Ïongpiah Jowai la sdang ïa ka Shad Sukra ha ka por 10 baje ha kaba la don ka jingkren pdiang sngewbha da u Hambiness Passah Vice-President ka Seiñ Raij Jowai, la ai ka jingnguh Blei da u Wh. Heipormi Challam Milliagot bad ka jingkren na u kongsan jong kane ka sngi uba dei u Myntri ka sorkar jylla jong ka Social Welfare Disaster ma Kyrmen Shylla MLA. Hangne la ïashim bynta ïa ka jingshad Sukra da ki 15 tylli ki kynhun na ki seiñ Raij bad ki don bapher bapher. Hadien kane kila leit mih shad ha Madan Biar ka Blai (Mission Compound) bad hangne kila don haduh saw kynhun kiba ïashim bynta haka jingshad kiba kynthup ïa ka Dulong, Chilliangraij bad ka Tpep-Pale.
Katba ha Iawmusiang la pynïaid ïa ka prokram da u Wh. O.R. Shallam President ka SRK, ha kaba u Chief Justice ba don burom jong ka Meghalaya High Court u Sanjib Banerjee ula long kum u kongsan, ha ka jingkren ula ai khublei ïa ki nongïalam ka Seiñ Raij kiba la lah ban pynlong ïa kane ka prokram Shad Sukra kaba phuh ba phieng kaba long kum shi bynta ban pynneh pynsah ïa ka Riti ka Dustur.
Ula pynpaw ka jingsngewkmen ban ïadon bynta lang ha kane ka sngi kaba phuh ba phieng, ula kitbok ïa ki khun ka seiñ raij ba kin nangïoh ïa ka jingkoit jingkhiah lyngba ka jingsumar sukher ïa ka mei maraing kaba long ka lawei ba phyrnai jong ki khun ki kti bad u kyntu ba dei ban pynneh pynsah ïa kane ka jingitynnad ba la don lypa bad ka jinngkhuid jingsuba.
Hadien ka jingïalang ki khun ka Seiñ Raij kila shim bynta ha ka jingshad kiba kynthup ïa ki 14 tylli ki kynhun jong ki longkmie, ki khun samla shynrang bad kynthei na ki dong bapher bapher bad kumjuh na ki Seiñraij.
La pynkut ïa kane ka sngi ha Mynkoi Pyrdi Iongpiah Jowai ha kaba por 8 baje mynmiet da kaba pynlong ïa ka jingpynbyrngia ba la shim bynta da ki dong bapher bapher kiba hap hapoh ka Seiñ Raij Jowai.