Jowai, Ïaïong 24: Ka Jaiñtia Students Movement (JSM) Central Body kala dawa na ka sorkar jylla ban kan shimkhia ban kyntu ïa ka sorkar kmie ba kan buh noh ïa ka Examination Centres jong ka ‘Common Entrance University Test’ (CUET) ha sor Jowai, na ka bynta ka ki samla pule jong ka thaiñ Ri-Lum Jaiñtia bad kin ïoh ban ïakhun ïa katei ka Exam.
Halor kane na ka liang u President ka seng samla Leningstar Rymbai, ula pyntip ba ka sorkar kmie kala pynbeit ban pynlong ïa ka Common University Entrance Test (CUET) (UG) 2022) na ka bynta ki Under Graduate Courses bad ki Bachelor Degree ha baroh ki Central Universities bad ki affiliated College jong kane ka Session 2022-23.
Shuh shuh utei u President ula buh ka jingkyntu ïa baroh ki samla pule kiba dang shu dep ban ïakhun ïa ka Class XII Examination mynta u snem ba kin pynrung kyrteng ïalade ha ka Common Entrance University Test (CEUT) khnang ba kin ïoh bteng ïa ka jingpule ha ki kyrdan Bachelor Degree. Ha ka juh ka por u kyntu ïa ki Heads jong ki Higher Secondary Schools bad Colleges ba kin pyntip khang sha ki samla pule naka bynta ka jingpynrung kyrteng ha ka CEUT.
U samla Rymbai u kyntu kito ki jaka ba leh online kum ki Rainbow Centres bad Cyber Cafes ban kin pdiang ïa ki samla pule kiba apply ïa ka CEUT. Ula dawa na ki ar Deputy Commissioner jong ka Jowai bad Khliehriat ba kin pdiang ïa ki samla pule lyngba ki NIC Cell jong kitei ki ophis khang ba ki samla kin ïoh lad ban thep kyrteng haka CEUT.
