Na ka projek ba 28 klur khmihlynti ka shnong Mawpat ban ïoh pahuh ïa ka um

Shillong, ïaïong, 22: Ki paidbah ka shnong Mawpat ki don mynta hapdeng ka jingkhmihlynti ba ka shnong Mawpat kan ïoh kham pahuh ïa ka umbam umdih ynda ladep ban pyntrei ïa ka projek sam umbam umdih kaba 28 klur. Ïa kane ka projek la buh mawnongrim da u Myntri Rangbah ka Jylla u Conrad K. Sangma bad u Myntri barim ka tnat PHE u Bah Renikton Tongkhar ha ka por ba ka Sorkar MDA-I ka dang bat ïa u lakam synshar.
U Rangbah Shnong jong ka shnong Mawpat u Bah Judah Wahlang ha ka jingïakren bad u nongthoh khubor u la ïathuh ba ka shnong Mawpat ïa mynta ka mad jingeh bha ha ka liang ka umbam umdih bad da ki spah tylli ki longiing ki shahniah ïa ka um da kaba shu thied manla ka sngi bad don ruh kiba don ïa ki tyllong um.
U la ïathuh ba ka jingmang pisa kaba 28 klur ban shna ïa ka projek sam um na ka tyllong um jong ki riewshimet ban sam ïa ka umbam umdim sha ka shnong Mawpat baroh kawei kaba don mynta kumba phra hajar tam ka jingdon jong ki nongshong shnong ka la poi mynta haduh 80 percent bad sa tang khyndiat sngi yn sa tei noh ïa ka jaka pynlang um khnang ban ïoh sam ïa ka um sha ki thliew ing jong ka shnong Mawpat.
U la pynpaw ruh ïa ka jingsngewkhia ba ka jingpynlip bording khah khah jong ka Meghalaya Energy Corporation Limited (MeECL) ka la ktah bha ïa kiba bun ki longiing ha kane ka shnong naba ki ïoh um tang shi kali nalor ba ki hap ban ap haduh lai ne saw sngi ban ïoh ïa ka um.
“Ka Dorbar Shnong ka la pyrshang ban ïakren bad ki bor badei peit halor kane,” u la ong.
“Kum ka shnong na ka por sha ka por ngi leit sha ka Sorkar bad sha ki tnat treikam bapher bapher ban pynsngew ïa ki jingdonkam namarba ka shnong Mawpat kam dei shuh tang ka pdeng jong ka Shillong kaba rim bad ka Shillong kaba thymmai hynrei mynta ka ladei ka khyrdop. Katba ki jingdonkam kiba manla ka sngi jong u u paidbah kum ka umbam umdih, ka bording bad ka surok ki dang duna shaba palat,” u la ong.
“Manla ka taiew ngi leit sha ki tnat treikam bapher bapher ban pynsngew ïa kane khnang katba dang biang ka por ba ki jaka ki dang heh ka la dei ka por ïa ki nongsynshar ban buh hakhmat eh ïa ki jingdonkam ba kongsan jong u paidbah namarba ynda hadien habud ynda ki briew ki la shna iing yn ym ïoh jaka shuh ban tih pynheh surok, ban tep ïa ki pipe um bad ban pynieng ïa ki post elektrik. Ki nongkynti shimet ki shet shaba palat ban shna ing ha Mawpat.” la ïathuh u Bah Wahlang.
“Ngi la mad ïa kine ki jingeh mynta da ki phew snem bad ngi khmihlynti ba ka Sorkar kam dei ban shu ieh kumto kumba long ha ka nongbah Shillong kaba rim. Na ka bynta ka New Shillong Towship, kata naduh Mawpat ter ter shaduh Mawkasiang, Mawpdang, Tynring manla ki tnat Sorkar ki dei ban dem ïa la ka khlieh ban shim ïa ki lai tylli ki mat ba kongsan ha kaba ïadei bad ka umbam umdih, ka bording bad ka surok,” la ïai ban u Bah Wahlang.
Katkum ka jingsngew jong u, ki pukri um ba ki briew ki la ksam ha kyrpong iing ban tan ïa ka um kin neh sa tang 15 haduh 20 snem. “Ym tang ha Mawpat, hynrei ka Sorkar ka la dei ban wanrah noh da ka Aiñ ban ithuh noh ïa ki tyllong um bad ki jaka ba shong um. Lada Sorkar kam ïada ïa ki tyllong um bad ïa ki jaka ba shong um kan sa buh jingeh. Ngi sngewthuh kumba ka long mynta ka Greater Water Supply Scheme ka dei tang na Mawphlang bad bun na ki shnong ha Sor bad khapsor. Katba ngi shahniah mynta ka long ban shu tan um beit na ki Pukri um. Katno kine kin lah ban shan,” la buh jingkylli u Bah Wahlang.
U la ai jingmut ruh ba ka Sorkar ka la dei ban bthah ïa kawei pa kawei ka longing ban buh kyrpang khyndiat ka jaka ha manla ki phyllaw iing bad ha ki jaka sorkar khnang ba lada hap u slap ka um kan ïoh ban rung shapoh ka meiramew namar lajan baroh ki thliew iing mynta ki la siang dewbilat ïa ka phyllaw ing bad ka um kam ïoh lad shuh ban rung shapoh ñiamra,” bad bynrap, “ka Sorkar ka hap ban ïohi lypa ïa kane ba la donkam ïa kata. Manla ka ing ka dei ban buh ïa ka Green Space ba ka um kan ngam sha ka meirawew. Kane ka dei ka mat kaba khia bha bad lada ngim shim ïa u mawjam ban leh noh mardor ïa kane ka kam ka thma um kan sa poi.”
Shuh shuh u la ong ba ki don ki shnong kiba don ïa ki wah ba ki la pyndonkam ban tan um hynrei kine ki la nang rngad suki pa suki. Ki don ruh ki wah duid kiba la mih pahuh bha ka um ha ki snem kiba mynshwa hynrei mynta la katno snem ngim ïoh shuh ïa ka um, u la ong.