Ki MLA ka Bri u Hynñiewtrep ki dei ban buh ïa ka jaidbynriew hakhmat ha ka rukom thungkam thungjam: OR Challam
![](https://mawphor.com/wp-content/uploads/2022/07/Article.jpg)
Jowai, Ïaïong 19: U ma O.R. Challam uwei na ki riew rangbah ha ka jingkren paidbah ha ka jingïalang ba la khot pynlong da ka Voice of the People Party (VPP) mynta ka sngi Balang ha Stand Ummulong, Iawmusiang Jowai, kaba ïa dei bad ka rukom pyntreikam ïa Roster System bad ka rukom thung kam thung jam Reservation Policy jong ka sorkar jylla.
Utei u riewrangbah ula ong kum ki MLA ka Bri u Hynñiewtrep (Khasi Jaiñtia) ki dei ban buh ïa ka jaitbynriew hakhmat bad ban ïasait hapoh ka ïing dorbar thawaiñ ban pynbha pynmiat ïa kane ka Reservation Policy kaba la dawa mynta ïa ki khun samla”.
Ha kajuh ka por ula khot ïa ka VPP ban kan ïaid shakhmat ban dawa pynbeit ïa kane ka rukom thung kam thung jam hapoh ka jylla da kaba pynlong ki jingïalang ha kylleng ki jaka.
Na ka liang u ma Challam ula pynsngew ba ïa ka rukom thung kam thung jam la pyntreikam naduh ka 12 tarik January, 1972 ha ka por ba ïoh ïa ka jylla Meghalaya, kum ki nongshong shnong ka jylla ki donkam ban ïoh ïa ka jingkylla hynrei la wan pynban mynta da ka apot ka Roster System.
Ula ong ha ka jingthung kam hapoh ka jylla la pynbynta tang ar jaitbynriew Garo bad Khasi mar 40/40 ïa ka Jaintia la pynhap lang ha ka Khasi, ha kaba ki nongïalam ha kato ka por kila pdiang ïa kane bad mynta la pyntreikam ïaka Roster System da ka ïing bishar ban pynïoh ïa ki kam na ka bynta ki Garo kaba kila duh naduh kitei ki snem.
‘Lada ka sorkar kam sngap ïa kine ki jingdawa ba pynsngew ka VPP halor ka rukom thung kam thung jam dei ban pynlong da ka jingïakhih na ka bynta ka lawei jong ki khun samla, namar bun ki samla kiba la tbit kila long pynbna kiba duh jingkyrmen wat hadien ba la pyndep ïa ka jingpule” ong shuh shuh ma Challam.
U kyntu ïaka seng VPP ba ka dei ban dawa na ka sorkar ban thaw kawei ka Committee ban peit biang ïa ka Reservation Policy ba kan long kaba biang hapdeng kine ki jaitbynriew hapoh ka jylla, da kaba ai por ïa ka sorkar kumba ar bnai.
Ha ka juh ka por ula kyntu ïa ki nongïalam ka VPP ba ki dei ban pynsangeh noh shi syndon ïa kane ka rukom thung kam thung jam katba ym pat pynbeit ïa kane ka Reservation Policy kaba noh shilliang hapoh ka jylla.