Sam kot lyngkdop ka KHNAM ban dawa pynduh noh ïa ka personal interview ha ka jingthep kam Sorkar

0

Shillong, ïaïong, 20: Ka Khun Hynñiewtrep National Awakening Movement (KHNAM) ha ka sngi Palei ka la sam da ki kot lyngkdop hajan ki shlem pule kiba don ha kylleng ka sor Shillong ban pynsngewthuh ïa ki paidbah ha kaba ïadei bad ka jingdawa ïa ka Sorkar ba ka dei ban pynduh noh ïa ka personal interview ha ka jingthep kam sorkar ha ki post kiba hap ha ka Group-B, C bad D.
Ha ka jingïakren bad ki lad pathai khubor, u Vice President ka KHNAM u Bah Thomas Passah u la ong, “ka Sorkar India naduh u snem 2016, lyngba ka Office Memorandum ka la rai ban pynduh noh ïa ka personal interview haba thep kam sorkar ha ki kyrdan Group-B, C bad D. Da kane kajuh ka lynti, ki 23 tylli ki jylla ha ka ri India ka shim ïa kajuh ka sienjam halor ka nongrim ba la donkam ban pynduhnoh ïa ka jingthepkam be-aiñ, ka jingthep kam lyngba ka jingithuh ïa ki Myntri Sorkar, ka jingithuh ïa ki briew kiba don ha ka bor, bad ka jingthepkam lyngba ka jingthong pisa, khnang ba ki samla kin ym shah knieh noh ïa ka hok jong ki.”
U la ïathuh ba ka KHNAM ka ladep phah da ka jingthoh sha ka Sorkar Jylla ban shim ïa kijuh ki sienjam bad ban weng noh ïa ka personal interview. Hynrei ka Sorkar Jylla kam shym la suidñiew ïa kane ka jingdawa jong ka seng.
U la pynpaw ruh ba kane ka jingshimkhia jong ka KHNAM ka dei namarba ka ïohi ba ki samla ki la duh jingkyrmen wat tang ban thep kam sorkar.
“Ban pynsngewthuh sha ki paidbah, ngi la sam ïa kine ki kot lyngkdop bad lada ngi ïohi ba ka Sorkar ka dang ïai leh mynthi, ka seng kan sa khot da ka jingïalang paidbah kaba heh bad lada donkam ruh wat ban ujor da ka Public Interest Litigation (PIL),” u la bynrap.

Leave A Reply

Your email address will not be published.