Shillong, Ïaiong 17: Ka Voice of the People Party (VPP) ha ka sngi Nyngkong ka la dawa na ka sorkar jylla ba ka dei ban thaw da ka Expert Committee na bynta ban ïatai halor ka jingdonkam ban pynkylla thymmai ïa ki jigdkhoh bad ki jingduna kiba don ha ka Reservation Policy khnang ban lah ban shim ïa ka rai kaba bhatam ban pynbeit ïa ki jingdkhoh ba bun ha ka polisi.
Haba kren ha ka jingïalang paidbah kaba nyngkong eh kaba ka VPP ka la lum ha Madan Heh Mawlai na bynta ban pynshai halor ka nongrim ba ka VPP ka ïeng ha kaba ïadei bad kane ka mat, u Preisident ka party u Bah Ardent M Basaïawmoit u la ong ba ka jingdawa ka VPP ban pynkylla ïa ka Reservation Policy ka dei ym na bynta ka jingmyntoi tang jong kano kano ka jaidbyriew hynrei na bynta ka jylla hi baroh kawei.
“Kum ka party haba ngi rah ïa kane ka mat ngim shym la hukum ne dawa ïa ka sorkar ba ka dei ban pynkylla ïa ka Reservation Policy ban ai bhah katno ïa ki Khasi bad katno ïa ki Garo, hynrei ha ka jingsngew jong ngi ka long ba dei ban thung da ka Expert Committe ha kaba ki dkhot kin dei na ki nongïalam jong baroh ar tylli ki jaidbynriew trai muluk ka jylla bad ki riewshemphang khnang ba da ka jingdon kane ka komiti yn lah ban ïatai bad shim ïa ka rai kaba bhatam,” ong u Bah Ardent.
“Lada ha ki snem ba mynhuwa ki nongïalam na ki ar kynhun jaidbynriew ki lah ban ïashong pyrkhat lang bad ban ïatreilang na bynta ban pynkhlaiñ ïa ka jingdawa jylla pura bad ngam ïohi ba lada don mon kam don jingeh ruh ban ïashong pyrkhat lang na bynta ban shim rai halor ka jingpynbeit ïa kiba bun bah ki jingduna kiba don ha ka Policy bhah kam ka sorkar,” u la bynrap.
U la ong ba ka jingdawa ka VPP ban pynkylla ïa ka Reservation Policy kam dei na kano kano ka daw ban wanrah ïa ka jingsngewpher jaidbynriew hapdeng u Khasi bad Garo hynrei ba kano ki jaidbynriew trai muluk kin ïoh ïa ka bhah kaba shongnia.
“Ka jingïakhun jong ngi mynta kam dei hapdeng u Khasi bad Garo hynrei ka dei hapdeng u paidbah nongshong shnong ka jylla pyrshah ïa ka sorkar bad kane ka polisi ba bun ki jingdkoh,” la ong u Bah Ardent.
“Ki para (Garo) jong ngi kim dei ban sngewthuh bakla kumba don ba pyrshang ïalam bakla namar ka VPP kam kwah ban shim ïa ka hok jong phi hynrei ngi kwah ba kaba bhatam na bynta ka jylla kan dei ka lynti shakhmat,”
U la ong ba ka jingdon kiba kynnoh ba ka jingdawa ka VPP ban pynkylla ïa kane ka polisi bhah kam kan pynlong pynban ïa ka kashari ban tuklar ïa kane ka mat ‘hynrei nga kwah ban pynshai ba kiba ong ba namar ba ka polisi bhah kam ka la palat ïa ka 50% kan shah pynduh syndon ha ka kashari, nga kwah ban ong ba kane ka dei ka jingïalam bakla phi mut ka Kashari kam tip seh ba ka bhah kam ha ka jylla ka la palat 50% namar ïa ka Roster ruh dei ka kashari ba shim sou Moto,’ ong u Bah Ardent.
U la ong ruh ba ka jingkyrshan kaba ka VPP ka ïoh na u paidbah ka long kaba khlaiñ na kata ka daw ka sorkar kam dei ban shim sting ïa kane ka jingdawa kaba ka party ka buh.
“Nga kwah ban kren da kaba shai ba lada ngi kren lut ïa ki jingduna kane ka polisi bhah kam ha khmat u paidbah kan wanrah ïa ka jingbitar kaba khraw ïa u paidbah hynrei namar ba kum ki nongïalam ngim kwah ban ai ding ngi la ai jingmut ïa ka sorkar ba kan leh ïa kaba dei da ka lynti kaba jaijai,” u la ong.
Shuh shuh u Bah Ardent u la ong ba ka jingpynshai paidbah jong ka VPP ïa ki nongrim jong ka ha ka Wat kaba nyngkong kan dei shuwa tang ha ki lai tylli ki jingïalang bad “lada ka sorkar ka mynti ïa ka jingdawa jong ngi ngin leit biang sha u paidbah ban pynshai ïa kane bad ngam artatien ba lada ka sorkar kam sngap ïa kaba ngi ai jingmut ki surok kin shlei da u paidbah uban ïakhih ryngkat bad ka party.”
U la ong ba na ka liang ka VPP ka buh tang ar tylli ki jingdawa ha ka sorkar kata ba ka dei ban thung noh da ka Expert Committee bad ban pynhsahngeh noh shuwa ïa ka jingpyntreikam ïa ka roster katba ym pat lah pynbeit ïa ka jingdkhoh kiba don ka ka Reservation Policy.
Lah ruh ban sakhi ba ha kane ka sngi u Bah Ardent u la pan ïa ka rai na ki paidbah la ka VPP kan ïaid shakhmat ha ka jingïakhun ïa kane ka mat ne kan sahngeh noh bad la ïohi ba baroh na ki paidbah kiba wan sha kane ka jingïalang ki la ïeng ban rahkti kum ka dak ban kyrshan ïa ka VPP ba kan ïaid shakhmat ban ïakhun na ka bynta kane ka kam.
