Jowai, Ïaïong 22: Ka Tnad jong ka Jowai Municipal Board (JMB) mynta ka shiteng synñia jong ka 22 tarik kala leit ban pynkhuid ïa ki ñuit ha Iawmusiang kiba la lumthup da ki bun bun bnai, ka jingsahkut jong kitei ki ñiut haduh mynta ka dei na ka daw ba ka tnad JMB kam pat ïoh satia ïa ka jaka theh ñiut kaba paka.
Ïa kitei ki ñiut ka JMB kala leit pynkhuid da kaba thep ïa ki hapoh ki trok dumper bad la pynïeng ïa ki ha ka surok hajan ka Thomas Jones Synod College Jowai.
Kaba la buh jingeh ïa ka tnad JMB ban leit theh ïa kitei ki ñiut ka long na ka daw ka jingpyshah jong kiba bun ki shnong, wat hadien uwei na ki nongshnong shnong ka Moolamylliang uba la dep ban ïasoi bad ki bor District uba la kloi ban leit theh ïa ki ñiut ha ka jaka shimet jong u kaba don ïa ka krem Dewïong ha Pynsymroo East Jaiñtia, hynrei ki paidbah na ka thaiñ Elaka Sutnga kila ïamih ban khang lad bad pynurlong ïa ka ïa kane ka jingthmu.
Kumba long mynta ki dang don ki jaka ba lumthup ïa ki ñiut ha Jowai kum ha ïew Seiñraij, ïew shyïap, ha u surok ïaidkjat hajan skul H.K. Singh SS, katba ha ïawthymme la thep kumjuh ïa ki ñiut hapoh ki trok dumper.
Ha ka jingshong bishar biang ïa ka mukot duma jong ka Synjuh ki Rangbah Shnong Jowai mynta ka sngi da ka ïing bishar ba don burom jong ka Meghalaya High Court la pyntip ba na ka liang ka tnad Municipal kan pynkhuid lut ïa ki ñiut na ki jaka ïew hapoh kane ka taiew.
