Sngewrem ban ong ba shen ka Meghalaya kan long ka jylla ba pawnam ha ki kam khalai : Ardent

Shillong, ïaïong 22: U Bah Ardent Miller Basaïawmoit, President ka VPP, u la pynpaw ka jingsngewkhia bad ka jingsngewrem kaba jur ïa ka jingpynlong aiñ ka sorkar MDA ïa ki kam ïakhalai ha ka jylla.
Ha ka jingkren lyngba ka Video, u Bah Ardent u la ong ba ka long kaei kaei kabym lah pdiang ba ka sorkar kan ong ba ka jingpynlong aiñ ïa ki kam ïakhalai kan wanrah ka jingbha.
“Ym lah pdiang ban ong ba ki kam sniew kin wanrah ïa kaei kaei kaba bha”, la ong u Bah Ardent.
Ka sorkar MDA, ka la pynïap noh ïa ka Meghalaya Prevention of Gambling Act 1970 bad ban pynmih bujli noh da ka Meghalaya Regulation of Gaming Ordinance 2021.
Da kaba pynpaw ka jingsngewrem bad sngewlehraiñ ba sorkar MDA kan pynlong ïa ka Meghalaya kum ka jylla kaba pawnam ha ki kam ïakhalai, u Bah Ardent u la ong ba ha ka jaidbynriew Khasi baroh ki tip ba ka kam khalai kadei ka kam kaba sniew, kaba wanrah ïa ka jingduk jingkyrduh bad pynïapait ïing pait sem. “Ha ka jaidbynriew Khasi kiba bun ki shim ba ka kam khalai kam dei tang ka kam sniew, hynrei kadei ruh ka pop”, la ong u Bah Ardent.
U la ong ruh ba kane ka aiñ kan wanrah shibun ki jingjot bad kan nym wanrah satia ïa kita ki jingbha kumba la khmih lynti ki nongïalam. Hynrei u la ong ba ruh ba kum ka jaidbynriew tip briew tip Blei kane ka jingleh ka sorkar bad ki kam kiba ka leh kan wanrah pynban ka jingbitar U Blei ïa ka jaidbynriew hi baroh kawei. “Kane ka pyni ba kane ka sorkar kam salia ban shim kino kino ki lad ki lynti kiba sniew ha ka kyrteng jong ka roi ka par”, u la ong.
U la wer ïa ki paidbah ba kidei ban ïeng pyrshah ïa kane ka jingsniew ba ka sorkar ka shim. U la ong ba ka sorkar ka la dei ban wanrah ki rukom treikam kiba bha ban kyntiew ïa ki paidbah kum ka jingkyntiew ïa ka rep ka riang, ka kam jngohkai pyrthei bad kiwei kiwei, ym dei ban wanrah da ki kam khalai ban aikam aijam.
U Bah Ardent u la wer ïa ki paidbah ba kin phai sha U Blei ban panmap ïa kine ki jingsniew kiba wan jia ha ka jylla, ïoh ba U Blei U theh ïa ka jingbitar, namar lada U Blei Um don ha ka liang jong ngi, kam myntoi ka jingïakhun ne jingïakhun ban pynbha ïa ka jaidbynriew.
“Kum ka jaidbynriew tip briew tip Blei bad kum ka jylla kaba bun ki Khristan to ngin pynrit ïalade hakhmat U Blei ban pan bor ban ïaleh pyrshah ïa kane ka jingsniew ba la wanrah da kane ka sorkar”, u la ong.