Nongpoh, Ïaiong 22: Ki nongïalam jong ka Dorbar ki Rangbah Shnong hynnin ka sngi kila leit ban ïakynduh ïa u Deputy Commissioner bad Additional Deputy Commissioner ka Ri-Bhoi District ban ïakren halor shibun ki mat ba kum ka Dorbar ka kwah ban pynsngew naka bynta ka bit ka biang ki paidbah.
Naka liang ka Dorbar ki Rangbah Shnong hapoh ka jingïalam jong u Bah BB Makdoh Chairman, Bah PB Sylliang Secretary bad kiwei ki nongïalam shnong kila ai ruh da ka jingthoh halor ka jingpynslem ïaka jingshim khana samari (census) haka district baroh kawei kaba la sahteng mynta la bun snem, ka jingsahkut ka pisa jong ka skhim MNREGA kaba la buh jingeh ïa kiba bun ki shnong haka them Ri-Bhoi bad shem jingeh wat ban pyntyllun ïaka kam bad kumjuh ruh ka jingsangeh ban sam ïaka shini rashon naduh u snem 2013.
Haba kren sha ki lad pathai khubor u Bah BB Makdoh Chairman ka Dorbar u la ong ba kum ka synjuk ka sngewkhia shi katdei halor ka jingpynslem ban shim khana samari kaba dei ban shim man ka 10 snem bad ong ba kane kala wanrah ia ka jingduhnong kaba khraw ïaki paidbah nong shong shnong jong ka them Ri-Bhoi ha kiba bun ki liang kaba la kheiñ bad iohnam ruh kum ka Aspirational District.
U la ong ruh ha kaba ïadei bad ka skhim MNREGA bun naki shnong kila byrngem ban sangeh treikam noh namar ka jingbym don pisa kaba la wanrah ka jingeh kaba khraw ïaki paidbah bad bun ki kam pynroi la hap ban pynsangeh noh namar ka jingbym don pisa watla ka dei ka skhim kaba la wanrah shibun ki jingkylla bad ki kam pynroi haki shnong pynban ki shnong kii mad jingeh ha kum kane ka por namar ki don ki shnong ki bym ioh wat tang ki MLA bad MDC skhim naki nongmihkhmat
Bad ka mat kaba khatduh ka dei halor ka jingpyn sangeh ïaka shini rashon kaba bun naki paidbah naki longiing ba duk ki ioh haki snem kiba mynshuwa, hynrei mynta ki paidbah kim ioh shuh la bun snem bad kum ka Dorbar ka kwah ïaka jingshai na ka sorkar ha kaba naka liang u DC u la kular ban shimkhia ïa kitei ki mat.
