Ym ïoh jingtip ba pynthut ki Seng ïa ka jingtrei ïa ka surok Shillong- Dawki : Prestone

Shillong, Ïaïong 10: U Symbud Myntri Rangbah ka jylla uba dei peit tuh ïa ka tnat PWD (Roads) u Bah Prestone Tynsong ha ka sngi Nyngkong u la ïathuh ba na ka liang jong u khlem ïohi jingtip eiei kaba thikna ba ka don ka jingpynthut da ki seng bhalang ïa ka jingpyntrei ïa ka surok Shillong-Dawki.
“Ngam ïoh jingtip ba don ki seng bhalang ba pynthut ïa kane ka jingpyntrei ïa kane ka surok bad ki kompeni ba pyntrei ruh kim ju ai kano kano ka ujor ïa kaba kum kata, hynrei lada ka don kaba kum kata nga lah ban khot ïa ki paralok seng bhalang ban ïakren bad ki,” ong u Bah Prestone haba kren sha ki lad pathai khubor.
Lah ban kdew hangne ba dang shen ka High Court jong ka Meghalaya ka la hukum ha ba shong bishar ba dei ban pynsahngeh shi dyndon ïa kino kino ki jingpynthut na ki seng bhalang ha kaba ïadei bad ka jingpyntrei ïa kane ka surok.
U Bah Prestone u la ong ba ha ka jingshisha ka jingeh kaba ka sorkar ka ïa kynduh ïa kane ka jingpyntrei ïa ka surok ka dei namar ka jingeh ban ïoh khyndew namar ka ka rukom bat khyndew ka dei beit ka jong ki riew shimet.
Lah ban kdew hangne ba ha ka 28 tarik u Lber ka National Highways and Infrastructure Development Corporation Limited (NHIDCL) ka la ai ka jingujor ha ka High Court ba ka jingslem ban pyntrei ïa kane ka surok Shillong- Dawki ka dei namar ka jingbym ïoh jaka ban pyntrei ïa kane ka surok bad kumjuh ka jingwan pynthud ba khah khah ki seng bhalang kaba la pynlong ïa ki kontraktor ban phet krad na kane ka jaka bad ban ieh shadien ïa ka kam kaba ki la ïoh kontrak ban pyntrei.